Elena Rybakina chuan player ṭha leh champion tura rinkai zinga mi Jelena Ostapenko a hneh. Australian Open 2023 khelh laiah, hmeichhe singles player hoah chuan Rybakina hi semifinal lut thei hmasa ber a ni.
Rod Laver Arena-ah nimin khan quarterfinal khelh a ni a, darkar khat leh minute 19 chhungin Rybakina hian 6-2, 6-4 in hnehna a chang. Kazakhstan hmeichhe zingah chuan Melbourne Park-a semifinal lut thei pakhatna a ni bawk.
Player pahnih hi Wimbledon title la tawh ve ve an ni a, theihna an nei sang. Australian Open bikah erawh an thlen san ber ṭum a ni thung, tun hma lam an intawn vawi hniha set hloh miah lo Ostapenko hi chak tura rinkai zawk pawh a ni.
Mahse, Melbourne khawpuia nipui boruak lum tak hnuaiah Rybakina a che thei zawk, a service neih ṭhat a chhawr ṭangkai, point hnuhnung ber hmu tur pawhin 'ace' a siam a, ṭum 11 ngawt aces a vaw chhuak.
Kum 23 mi Rybakina hian a match hmasa lamah pawh Iga Swiatek a lo hneh tawh, world number 1 a hneh vawi khatna a tawng a, tunah chuan player ṭha Ostapenko a hneh leh tak avangin inrintawkna a nei sang zual tawh ang.
Wimbledon champion Rybakina chuan, "A vawi khat nana Australian Open semifnal ka lut thei hi ka hlim takzet. A nihna takah chuan ka zam ve khawp mai, a bik takin set hnihna game hnuhnung ber kan khelh lai khan rilru a hah.
"Inkhel hautak takah hnehna ka chang thei a, rilru huaisen taka ka paltlang thei kha ka lawmna tizualtu a ni. Ostapenko kha a ball vuak a nain dawnsawn a harsa thei hle. Midang inkhel en ka duh a, chutihrualin hahchawlh ka mamawh ve bawk," a ti.