Zaninah Man United Vs Nottingham Forest

Manchester United-in Arsenal laka an tlawm hnuah League Cup semifinal first leg khel turin City Ground an tlawh dawn a, zanin dar 1:30 hian Nottingham Forest an hmachhawn ang. Red Devils hian kum 31 kal ta khan League Cup nomawi hi Sir Alex Ferguson-a hoin a vawi khat nan an chawi a, hemi ṭuma semifinal-a an hneh chu Forest hi an ni.

Erik ten Hag-a hote hian Gunners laka an tlawm hmain Crystal Palace lakah point khat chauh an hlawh chhuak a, match hnih chhung chak hmel hmu tawh lo mah se English club zinga nomawi pali beisei thei awmchhun an ni. Premier League-ah United hi palinaah an awm mek a; League Cup bakah FA Cup leh Europa League-ah an la dam vek.

Ten Hag a lawm lo

Man United manager Erik Ten Hag-a'n Arsenal an hneh loh zawhah player-te rilru put hmang a sawisel. Dutch manager Ten Hag chuan, "Tun dinhmunah chuan ka lungawi lo. Player bulah pawh nomawi in duh a nih chuan kan rilru puthmang kan thlak a ngai, tih ka hrilh," tiin a sawi.

Red Devils hian November 6-a Aston Villa an hneh loh hnuah hneh loh nei loin match 10 an kaltluang a, kar liam ta khan Arsenal lakah a tawp. Ten Hag-a hote hian minute 90-naah goal an chhuah a, Gunners lakah an tlawm phah. Palace nena an inhnehtawk ṭumin Eagles-in injury time-ah freekick aṭangin siphurh an sut bawk.

Man United hian match hnuhnung pahnihah beisei ang result hlawh chhuak lo mah se inelna paliah nomawi an la beisei avangin nomawi pakhat tal chawi turin an dinhmun a ṭha a, League Cup-ah nomawi chawi tura rinkai an ni.

Team ṭha zawk

Man United hian semifinal a nih tawh avangin League Cup quarterfinal-a Chartlon Athletic an hneh ṭum aia player ṭha zawk an luhtir a rinawm a, Arsenal laka hrem vanga khel thei lo Casemiro a khel a nih pawhin thilmak a ni lo ang.

Chutihrualin League Cup semifinal hi double leg-a khelh tur a ni a, Old Trafford-a second leg khelh tur a la nih avangin Ten Hag-a'n sa huai a ser kher a rinawm loh. United hian inhliam vangin tun season-ah Donny van de Beek an chhawr thei dawn tawh lo a, player dang erawh an khel thei tura ngaih an ni.

Training-naah World Cup hnua la inlan lo Jadon Sancho pawh a tel tawh a, player naupang zawk Kobbie Mainoo leh Zidane Iqbal te pawh an tel. Forest lakah hian kum 18 mi Alejandro Garnacho chu bul ṭan thei dinhmunah a ding. Man United-in inkhelh tur an ngah avangin Ten Hag-a tan squad siksawi ṭhat a ṭul dawn.

Henderson tel loin

Nottingham Forest-in Wolves an hneh theih chhan chu goalkeeper Dean Henderson a ni a, English keeper hi Man United aṭanga loan hmanga an hawh a nih avangin Forest-in an chhawr thei dawn lo. Henderson hian malpui hliam a nei hrim hrim bawk.

Newcastle United aṭanga loan hmanga an hawh Chris Wood pawh Magpies tan League Cup a khelh tawh avangin a inlan thei dawn lo a, Forest hian hliam an ngah viau bawk. Taiwo Awoniyi, Omar Richards, Moussa Niakhate, Giulian Biancone leh Cheikhou Kouyate te chu hliam vangin an khelh theih a rinawm lo bawk.

Chutihrualin Man United aṭanga an lakluh Jesse Lingard a dam tawh a, English midfielder hi a club hlui tan a hnawksak thei ang. Forest hian December thla khan Man United chu Old Trafford-ah 3-0 in an hneh lo a, League Cup semifinal-a chak turin vanneih tel a ṭul ang.

Final kalkawng

Nottingham Forest
European football khel pha lo Premier League club-te League Cup second round aṭangin an inlan ṭan. Forest hian Grimsby Town chu 3-0 in an hneh a, third round-ah Tottenham Hotspur chu 2-0 in an hneh. Steve Cooper-a hote an che ṭha zel a, fourth round-ah Blackburn 4-1 in an sawp a, quarterfinal-ah Wolves nen 1-1 in hnehtawk mah se penalty shootout-ah 4-3 in an vannei ta zawk.

Forest hi Premier League-ah 13-naah an awm mek a, amaherawhchu relegation zone-a awm team-te nen an inthlauhna hi point li chauh a nih avangin an dinhmun a him lo. Chutihrualin League Cup semifinal a ni tawh a, Steve Cooper-a'n player neih ṭhat a chhawr ang.

Manchester United
Manchester United-in Europa League an khelh avangin third round aṭangin an inlan a, match hmasa berah Aston Villa 4-2 in an hneh. Fourth round-ah United hian Burnley 2-0 in an hneh a, quarterfinal-ah Charlton Athletic 3-0 in an hneh leh bawk.

United hian quarterfinal-ah League One club an chan fuh avangin Erik Ten Hag-a'n squad a siksawi ngam a, first eleven chang tam tawk lo player Tom Heaton, Harry Maguire, Scott McTominay, Fred leh Anthony Elanga te an khelh bakah academy player Kobbie Mainoo ten bul an ṭan a ni.

United leh League Cup semifinal

1970s: Man United-in 1970 chhoah vawi thum League Cup semifinal an khel a, an chak lo vek. 1969/70-ah Man City lakah 4-3 in an chak lo a, 1970/71–ah Villa 3-2 in an hneh lo a, 1974/75-ah Norwich 3-2 thoin a hneh lo.

1980s: Ron Atkinson hnuaiah 1982/83 semifinal-ah Arsenal 6-3 in an hneh a, mahse final-ah Liverpool an hneh lo.

1990s: Sir Alex Ferguson hnuaiah United-in League Cup nomawi an chawi ve chauh. 1990/91 semifinal-ah Southampton 4-3 in an hneh a, 1991/92 semifinal-ah Middlesbrough 2-1 a hneh lehin 1993/94 semifinal-ah Sheffield Wednesday 5-1 in an sawp. Kum 1991 final-ah Sheffield Wednesday an hneh lo a, 1994 final-ah Aston Villa an hneh lo. Chutihrualin 1992 final-ah tun ṭum semifinal-a an hmachhawn tur Nottingham Forest an hneh a, League Cup nomawi hmasa ber
an chawi.

2000s: Kum 2000 chhoah Man United an che ṭha lehzual a; 2002/03 semifinal-ah Blackburn 4-2 in an hneh a, 2004/05 semifinal-ah Chelsea 2-1 in hneh lo mah se 2005/06 leh 2008/09 semifinal-ah Blackburn (3-2) leh Derby (4-3) an hneh. Kum 2002 final-ah Man United hi Liverpool lakah an tlawm a, 2006 leh 2009 final-ah erawh Wigan Athletic leh Tottenham hnehin an champion ve ve.

2010s: 2009/10 semifinal-ah Man United-in an hmelma Man City 3-2 in an hneh a, final-ah Aston Villa hnehin an champion. Sir Alex Ferguson hoa League Cup an chawi hnuhnun ber a ni. 2013/14 semifinal-ah Sunderland chu penalty shootout hmangin an hneh lo a, 2016/17 semifinal-ah Hull City chu 3-2 in an hneh a, final-ah Southampton chu 3-2 a hnehin Jose Mourinho hoin an champion.

2020s: 2019/20 leh 2020/21 season khan semifinal lut ve ve mah se Pep Guardiola kaihhruai Man City lakah an tlawm ve ve. Ole Gunnar Solskjaer hnuaiah Man United-in nomawi an chawi lo a, Jose Mourinho hnuah nomawi an chawi leh tawh lo tihna a ni.