Pele kawr an lilam dawn

Football player awm tawh zinga ropui ber ang hiala mi tam takin an ngaih, Brazil legend Pele-a'n ram tana a match hnuhnung bera a hak hman loh jersey chu lilam a ni dawn a, £30,000 (Rs. 30,15,617.72) vela hralh theih an inbeisei.

Pele hian kum 1971 khan Yugoslovia an hmachhawn ṭumin Brazil tana a match hnuhnung ber a khel a, hetah hian a hak tur jersey number 10 pahnih siam niin, tuna an lilam tur hi a hak hman loh zawk a ni.

Kum 82 mi ni a, December, 2022-a thi Pele hian team masseur (massage thiam) hnenah he jersey hi a pe a, Shropshire, England-a restaurant manager chuan a hnuah he jersey hi a lei a, kum 2020-a a lei a nih thu a sawi.

Jersey lilamtu tur Hansons Auctioneers hnena Pele jersey lilam tura titu chuan, "Football thil hlu tak, duat taka enkawl phu a ni. Mi tam zawkin an hmuh theih tura phochhuah a, a bik takin Brazil lama a awm leh hi a ṭul a ni," a ti.

Hansons chuan, "Pele hian a jersey hak loh zawk chu team masseur Abilio Jose de Silva hnenah a pe a ni," an ti a, Nocaute Jack tia koh ṭhin masseur hi kum 1960-1994 inkar kha Brazil national team-ah hian a thawk a ni.

Pele kawr hi Hansons chuan February 15-ah an lilam tur thu an sawi a, Nocaute Jack fanuin Pele jersey ngei a ni, tih a tihchianna lehkha nen lilam a ni ang.

Brazil tan match 92-a goal 77 khungtu Pele hian a career chhung zawng khan match 1,363 khelin, goal 1,281 a khung a, ani aia goal khung hnem an awm lo - World Cup-a vawi thum champion thei awmchhun a ni a, kum 2000 khan FIFA Player of the Century-ah thlan a ni.