City-in Maximo Perrone an lalut

Manchester City chuan Argentinean midfielder Maximo Perrone chu Velez Sarsfield aṭangin pound maktaduai riatin an lalut a, kum nga leh a chanve chhung an hnena khel turin contract an ziahpui.

Kum 20 mi Perrone hian March, 2020 khan a inzirchhuahna Vélez Sarsfield tan a professional match hmasa ber a khel a, match 33 khel tawhin goal thum a khung a, assist vawi hnih a nei bawk.

Buenos Aires club hi South American Champions League - Copa Libertadores semifinal a lo hruai thleng tawh a, mahse, Flamengo laka an tlawmna inkhelah a inlan ve thei lo.

Perrone hi South American Under-20 Championships khelin Argentina U20 tan a feh chhuak mek a, February 12-a final khelh tur inelna zawh hunah hian City a zawm ve chauh ang.

Argentina senior team tana la inlan lo Perrone hian Colombia-a South American U20 Championships khelh zawhah City hi a zawm dawn a, Pep Guardiola enkawlna hnuaiah training a nei dawn.

Chutihrual chuan Perrone hi tun season-ah chuan kan la hmu kherin a rinawm lo - City hian nakin hun thlira lalut an ni a, Pep-a hnuaia hmun chang nghal tur chuan a la nau hret a, a tawnhriat a la tam tawk lo bawk.