Dan theih loh Novak Djokovic

Tennis player ten inkelh thiamna hmun bik an nei a, player ṭha zual bikte pawhin 'Bial him' an nei fur - Novak Djokovic tan chuan Australian Open hi vanram tlafual a chen theihna hmun a la ni reng.

Nimin tlai khan Djokovic hian Andrey Rublev chu 6-1, 6-2, 6-4 in a sawp a, hnehna chang tur hian darkar hnih leh minute thum bak hun a mamawh lo. Semifinal-ah American tlangval, inelna liana tawnhriat la nei tam lo Tommy Paul a hmachhawn leh dawn a ni.

Kum 35 mi Djokovic chuan, "Hetiang ang hmun leh hun hi nuam ka tih zawng tak a ni a, mipui lamin min thlawp a nih chuan kawng hi a awlsam phah ṭhin. Hun pawimawh lai taka point ka hmu leh chat theih kha ka vannei hle.

"Semifinal hi sawi lawk theih a ni dawn lo. Ka khingpui tur Tommy Paul tan hian hloh tur engmah a awm ve lo, tun tournament a khelh dan thlir phei chuan fimkhur taka ka khelh a ngai dawn," tiin a sawi.

Novak a nghet

Rod Laver Arena chhunga inkhel entute chu 'Nole, Nole, Nole...' tiin an au rual dual dual a, an ram mi ni chiah lo mah se Australian mipui ten Djokovic an ngaina, a theihna a san bakah mipui puihna a dawng ṭha bawk a, nuamsa takin hnehna a chang.

Russian tlangval Rublev hi seeded parukna chang phak a ni a, champion tura rinkai zingah pawh a tel. Mahse, player ṭha bik Djokovic lakah a service vawi nga a hloh a, a khingpui hi vawi khat mah a chhuhsak let ve thei lo a ni.

Serbian star hian Grand Slam title 21 a nei tawh, major title la hnem ber Rafael Nadal (22 titles) tluk turin match hnih chak chauh a hmabak tawh. Champion nomawi bakah title hlu bik neih hnem kawnga inelna hi tun season chu a la ngaihnawm zel dawn.

Chak lo Rublev erawh a la vanduai chhunzawm zel - Grand Slam quarterfinal bikah chauh pawh vawi sarih a tlawmna a ni, season hmasa French Open-ah pawh Marin Cilic hneh loin semifinal a lut phak lo chiah tawh bawk.

Hmabak Tommy Paul

Nimin quarterfinal inkhel hmasa zawkah Tommy Paul chuan player chhuak thar Ben Shelton chu 7-6 (8-6), 6-3, 5-7, 6-4 in a hneh a, tennis inelna lian Grand Slam bikah chuan semifinal a luh vawi khatna a tawng.

Paul hi kum 25 mi a ni tawh, a hneh tak Shelton hi kum 20 mi chauh a la ni thung. Shelton hian online hmangin college a la kal a, tun tournament a khelh bak hi chu ram dangah a la zin ngai lo - a tan chuan tournament hriat reng tawh tur chu a ni tho.

World number 35 Paul chuan, "Rod Laver Arena-a ka inkhelh vawi khatna a ni a, major tournamnet quarterfinal ka khelh hmasak ber a ni bawk. Tennis player zawng zawng tan chuan Grand Slam last 16 thlen chin hi chu kan duhthusam a ni vek.

"Shelton pawh US pawna a zin vawi khatna a ni a, semifinal thleng zo ta chiah lo mah se a tan chuan a hlu viau thoin ka ring," a ti. American player zingah chuan Paul hi kum 2009 hnua Australian Open semifinal khel leh thei hmasa ber a ni dawn.

Rinkai Tsitsipas

Roger Federer, Rafael Nadal leh Novak Djokovic ten Grand Slam nomawi an inchawi chhawk deuh ngar ngar a, midang tan hmun an kian tlem hle. Tun tournament kal laiah pawh Novak hi rinkai a ni, a chuh buai thei tur chu Stefanos Tsitsipas a ni.

Greek tlangval hian Jiri Lehecka chu 6-3 7-6 (7-2) 6-4 in a hneh, tun hnai kum nga chhunga a vawi li nan Australian Open semifinal a lut. Zirtawpniah Karen Khachanov nen an inkhel leh dawn - Khachanov hian Sebastian Korda chu 7-6 (7-5), 6-3, 3-0 in a hneh ve thung.

Seeded pathumna Tsitsipas chuan, "Set thum chauh kan khel, mah se tun tournament ka khelh tawh china match harsa ber a ni hial ang. Player tawhkhirh tak laka ka tlang thei hi ka lawm. Semifinal hi a hautak zual ngeiin ka ring," a ti.

Chak lo zawk Lehecka hian a match hmasa lamah Borna Coric, Cameron Norrie leh Felix Auger-Aliassime te a hneh thei. Tsitsipas lakah pawh break point vawi riat ngawt a hmu, mahse a khingpui service hi vawi khat mah a chhuhsak theih loh chu a tuar a ni.