Sabalenka hmachhawn tur Linette
Australian Open 2023 khelh ṭan a nih hma khan, tennis ngaina tute chuan semifinal chinah Poland nula hmuh ngei an inring - a hming chu Iga Swiatek a ni. Polish player chu an hmu ngei dawn, mahse a hming erawh Magda Linette a ni thung.
World number 45 Linette-a'n beisei phak baka ṭhain inelna a hmachhawn. Thawhṭanni zan quarterfinal inkhelah Karolina Pliskova chu 6-3, 7-5 in a hneh a, a thlen chin apiang hi a tan chuan thil thar a ni zel; tun hmain Grand Slam third round pawh a la pel ngai lo.
Kum 30 mi Linette chuan, "Ka theihnghilh tawh ngai lo ang, tun tournament ka khelh dan hi chu ka dam chhunga ka hriatreng tawh tur a ni," tiin a sawi. Vawiin hian Aryna Sabalenka nen semifinal an khel chhunzawm leh ang.
Quarterfinal inkhel dangah Sabalenka chuan Donna Vekic 6-3, 6-2 in a lo hneh ve thung. Belarusian star hian Grand Slam semifinal a luh vawi lina a ni a, tawnhriat a nei ṭha tawh ang reng hle, vawiinah pawh rinkai zawk a ni dawn - beisei loh result erawh thleng thei a ni ve bawk.
Vawi hnih champion tawh Victoria Azarenka pawh a la chak zel. Azarenka hian Jessica Pegula chu 6-4, 6-1 in a hneh. Azarenka hian Wimbledon champion Elena Rybakina a hmachhawn ve leh thung dawn a ni.