Kolkata club ṭha Mohammedan SC-in I League khel turin Aizawl an rawn tlawh a, vawiin tlai dar 4:30 hian RG Stadium-ah Aizawl FC nen an inkhel dawn. Mizo club hian point 17 an hmu mek a, Mohammedan aiin point khat chauhin an hmu tam - table chung lama awm turin team pahnih tan chak a pawimawh ang.
January 13 khan Kolkata-ah club pahnih an inkhel tawh a, Mohammedan hi an vannei hle. Mizo club hian ṭum hnih ngawt hma an hruai a, amaherawhchu Marcus Joseph hmangin Mohammedan hian first half leh second half injury time-ah an sut ve ve. Goal hnuhnung zawk phei chu injury time-ah pawh minute 12-naa an khung a ni.
A fuh tawk lo?
Aizawl FC hian season bul an ṭan fuh tawk lo a, khelh ṭhat ṭumah point thum hmuh an harsat bawk nen an khelh tawh chin thlir chuan champion a harsa tawh ang. Chutihrualin an chet ṭhat season chu ni se nomawi hial chawi thei an ni a, tuna hmahruaitu Roundglass Punjab nen pawh hian point kua zeta inhlat siin khelmualah erawh an inhnaih viau.
Mizo club budget a san tawk loh avangin foreinger ṭha ber ber an la thei lo a, tlarhmaah Henry Kisekka-a'n theihna nei sang deuh mah se player dang erawh an intluk tawk hle. Mizo player-te pawhin foreign player-te an el pha a, hei tak hi hun pawimawha an chetsualna chhan niin a lang.
Chutihrualin coaching staff-ten player tan inelna an siam tawk lo tiin a sawi theih bawk. I League bikah hian Mizo club hian player chhawr bik an nei a, result ṭha neih loh ṭumah pawh chawr ngaite bawkin hmun an chang niin a lang.
Season ṭan hmain Aizawl FC-in Mizo player ṭha an la khawm a, I League khelh duh vanga AFC zawmtute hi an beisei ang hun ṭha pek an ni lo. Club chhungah inelna thianghlim a awm tawk loh avangin inkhel result pawhin a tawrh phahah a ngaih theih bawk.
Hun ṭha chu
Aizawl FC coach Caetano Pinho thlirna erawh a dang thei a, player ṭha ber a thlang a nih chuan dem theih erawh a ni lo. Mizo club tana inlan Mizo player-te hi an khel ṭha ṭhin miau a, starting eleven bakah bench aṭanga lutte thilirin thilmak tih tur a awm lo.
Chutihrualin Pinho hian thutlukna dik a siam ngei a nih tih finfiah nan Mohammedan hi a hneh a ṭul a, I League inkhelin ngaihven a hlawh theih nan result ṭha an mamawh. Mizo club tan vawiin tlai hi point thum hlawhchhuah hun ṭha a ni.
Kolakta-ah Marcus Joseph an veng thei lo a, RG Stadium-ah an ven hneh a ṭul dawn. Hei bakah hian Mohammedan-ah hian Mizo tlangval Vanlalzuidika Chhakchhuak leh Zothanmawia (T. Mawia) te an tel bawk.