League Cup: Magpies tan final a hnai

English football-a inelna ngaihhlut hlawh League Cup semifinal hmasa zawk chu Thawhlehni zan khan khelh a ni a, Southampton khelmuala first leg inkhelah Newcastle United chuan 1-0 in hnehna an chang.

Magpies tan Joelinton chuan inkhela goal awmchhun hi minute 73-naah a khung a, St Mary's Stadium-a inkhelah mualneitu Southampton lamin a chhanletna tur an nei lo a, mahni mualah an tlawm.

Premier League mawngphah luahtu Saints tan beiseina erawh a la bo tawp bik lo. January 31, zan dar 1:30-ah second leg khelh a ni dawn a, St James' Park-ah an lenglut ve thung ang.

League Cup-ah away goal rule hman a nih loh avangin Saints tan lungngaih belhchhahna tur a awm lo a, 1-0 chauha an tlawm avangin beiseina a la awm - nizan khan semifinal lehlamah Manchester United leh Nottingham Forest an inkhel a, he thu buatsaih a nih lai hian result kan hre hman lo.

A rei ta

Magpies hian rei tak chu champion nomawi chawi loin hun an hmang tawh - nomawi lian tham an chawi hnuhnun ber chu kum 1969 daih kha a ni tawh a, Inter-Cities Fairs Cup-ah an champion.

A tawi zawnga sawi chuan, tuna Mag-pies fans tam zawk hian an club champion lai an la hmu lo - major tournament-a final an khelh hnuhnung ber pawh kum 1999 kha a ni a, FA Cup final-ah Manchester United chu 2-0 in an hneh lo.

Saudi Arabia aṭanga sum hnar an neih hnuah Magpies an insiamṭha a, an tan Premier League nomawi em chu la sang deuh mah se League Cup hmang tala champion awmzia hriat ve an châk.

Mahse, Magpies hian Saints lakah chakna goal khung turin minute 73 an nghah thlen a ngai a, coach Eddie Howe hnuaia season duhawm tak hmangtu Joelinton chuan Alexander Isak-a siamsak chu goal-ah a chantir.

A hmuhnawm

Premier League aṭanga tla thei dinhmuna ding mek Southampton-in League Cup result hmanga fan-te rilru na thawidam an châk a, mahse, an beisei ang result erawh an hmu thei lo.

Minute 86-naah Saints tan defender Duje Caleta-Car chu a yellow card pahnihna avangin hnawhchhuah a ni a, Croatian centre back tel loin second leg chu an khelh a ṭul dawn tihna a ni.

Saints-in hnehna chang zo lo mah se an khelh danah erawh beisei tur a awm a, Magpies keeper Nick Pope chet ṭhat zan ni lo se goal khungin an haw ngei ang - mahse, Pope a ding nghet tlat.

English keeper hian bench aṭanga luhtir Che Adams khung ngei tur nia lang chu vawi hnih ngawt ṭha zetin a dansak a, kum 26 mi forward ke hmui loh zan leh Pope chet ṭhat zan a intawng.

A chhehvel

Magpies tan Joelinton-a'n goal a khung hnuah Adam Armstrong chuan si phurh a sutah inngai mah se, video assistant referee (VAR) hmanga ennawn a ni a, a handball avangin a goal khung pawm a ni lo.

Armstrong-a goal khung pawm a nih loh avangin Pope chuan match 10 zet chu a zawnin goal a chhuah ta lo tihna a ni a, kum 30 mi keeper hi tam tak chuan Jordan Pickford aiin England first choice keeper ni turin an duh tawh.

Saints chak zo lo mah se, manager Nathan Jones chuan an khelh danah a lawm thu sawiin, "Kan khelh danah ka lawm hle. Kan khingpuite hi top team an ni a, tharum an ngahin an lian hle.

"Player lakluhna hun an nei ṭha a, an lalut ngei bawk a, anni ang team hmachhawn hi chuan a awlsam ngai lo a ni. Kan khel ṭhaah ka ngai - chance an nei nual a, keni pawhin kan nei ve tho," a ti.

A la tawp lo

Second leg khelh tur a la awm miau a, goal khat chauha hnehna chang Magpies tan lawm viau a la hun lo - coach Howe pawhin hei hi a hrechiang a, English coach chuan hnathawh tur an la neih thu a sawi.

Howe chuan, "Team pahnihin chance duhawm kan nei ve ve a, chak theihna chance pawh kan insiam ve ve. Mahse, tunah hian half time ang chauh a la ni a, tih tur tam tak a la awm a ni," a ti a, second leg an la khel dawn tih a hai lo.

Kum 45 mi coach chuan sawi zawmin, "Sawisel tur ka nei lo - tlarhnung kan veng ṭha a, Nick pawhin save ṭha tak tak a nei leh tawh. Kuminah a khel ṭha takzet - a hmaa dingten an hna an tlin rualin, mamawh hunah tak a lo lang leh ṭhin.

"Hnehna kan chan avangin ka lawm a, kan tum ber pawh a ni. Mahse, 1-0 hi chu a derthawng tih kan hria a, engmah a la chiang lo," a ti - a naute chu la fimkhur reng turin a chah.