Kum li zet khelh a nih tawh loh hnuah Hero Super Cup chu kumin aṭangin khelh ṭan a ni leh dawn ta a, April 8-25, 2023 chhungin Hero Super Cup hi Kerala-ah khelh a ni ang.
Kochi, Kozhikode leh Thiruvananthapuram khawpuiten inelna hi an thleng dawn a, India rama football league sang ber Indian Super League-a team 11 chuan qualifier khelh ngai loin Super Cup hi an khel dawn a, I League champion an tel bawk ang. 
Team 16 inelna tura ruahmanna kalpui a nih avangin, hmun ruak pali la awm chu qualifier hmanga inchuh tur a ni a, I League table-a pahnihna aṭanga 10-na ten hmun ruak hi an inchuh dawn. 
Qualifier 1-ah I League-a pakuana leh 10-na te an intawng ang a, a chak zawkin Qualifier 2 an lut ang - Qualifier 2-ah hian team pariatte chu knockout match hmangin an inel ang a, a chak zawk ṭheuh chuan Super Cup an khel dawn a ni. 
Ruahman dan chuan April 21 & 22-ah semifinal khelh tur a ni a, final chu April 25-ah khelh a ni ang. Hero Super Cup champion chuan I-League (2021-2022) champion Gokulam Kerala FC nen AFC Cup (2023-24 ) khel tur an zawng ang a, Gokulam hi an champion chuan AFC Cup khel turin an tling nghal dawn thung. 
Hero Super Cup hi 2018 leh 2019 ah chiah khan khelh a ni a, a hmasa zawkah Bengaluru FC champion in, a hnuhnung zawkah FC Goa an champion. 
FC Goa hian zanin dar 7:30-ah ISL match an khel dawn a, playoff khelh beisei team hian East Bengal FC an mikhual ang - ISL hi zan thum chu an chawl tawh a ni.