Real-in Atletico tan ticket an ui!

Copa del Rey quarterfinal-ah zanin hian Real Madrid leh Atletico Madrid an intawng dawn a, Santiago Bernabeu-a inkhel turah hian Madrid chuan an ṭhenawm club Atletico tan ticket an pe chhuak tam duh lo!

Zanin dar 7:30 hian Atletico Madrid-in Copa del Rey semifinal luh ngei tumin Real an lenchilh dawn a, a tir aṭangin boruak a 'hot' nghal - Real chuan an khelmuala lenglut tur Atletico fans tan ticket 600 chiah an pe chhuak thei a, hei hi a tira pek an tum zat 334 ai chuan la tam tak a ni.

Copa del Rey quarterfinal hi single leg a ni a, mipui 81,044 lennaa fans 600 chauh neih hi Atletico tan chuan a tuiawm lo khawp ang. Hei chauh a ni lo - €70 (Rs. 6,203.55) man ticket hi stadium-a 'fourth tier' a awm a ni a, helai aṭang hian inkhel en a nuam vak lo, niin an sawi.

La Liga leh Copa del Rey-in mualneitu club-in an khingpui tur club hnena ticket an pek chhawn theih zat an tarlang lo a, an duh zat pe chhuak turin Real hian zalenna an nei tlat.

Atletico Madrid forward Antoine Griezmann chuan, "Thil mak tak a ni," tiin Real Madrid-in ticket an pe tlem lutuk chu a dem a, zaninah khelmualah zirtirna pek a châk ang.