UEFA-in Chelsea vangin FFP siamrem dawn
European football-a thuneitu sang ber UEFA chuan tun hnaia Chelsea-in player contract an ziahpui dan a zirchiang a, London club chet dan avangin Financial Fair Play rule an siamṭha dawn!
Chelsea hian tun hnaiah player an lakluhin, tun hmaa contract pangngai ang ai maha rei an ziahpui ṭhin a, tun hnaia pound maktaduai 89-a an lakluh Mykhailo Mudryk pawh kum riat leh a chanve chhung atan contract an ziahpui!
Contract rei zawng an tihpun hian an transfer fee hi tlemte angin a lang thei ta ṭhin a, Mudryk pawh hi Chelsea hian a manah kum khata pound maktaduai 11 vel seng angin an ziah luh theih phah.
Hei tak hi UEFA chuan a duh lo a, player-te chu kum nga aia rei contract ziak thei lo turin ruahmanna an siam dawn. UEFA chuan FFP dan thar hi tuna hman turin a tinghal dawn lo a, nipui transfer-ah an hmang ṭan chauh ang.
Tun hnaia Chelsea player lakluh zingah France defender Benoit Badiashile leh Ivory Coast striker David Datro Fofana te chuan kum ruk leh a chanve chhung atan contract an ziak a, PSV Eindhoven aṭanga an lakluh Noni Madueke chuan kum sarih leh a chanve atan contract a ziak.
Leicester City aṭanga an lakluh Wesley Fofana chuan kum sarih atan contract a ziak a, left-back Marc Cucurella chuan kum ruk chhung atan contract ziakin, Raheem Sterling-a'n kum nga chhung atan contract a ziak bawk.
Chelsea hian nipui lai aṭang tawh khan player lakluh nan £450mtd an seng tawh a, mahse, player-te hi hun rei zawk atana contract an ziahpui ṭhin avangin FFP dan bawhchhe ang taka lang, bawhchhe si loin an awm theih phah a ni.
London club hian European inelna regular taka an khelh avangin FFP bakah hian Premier League's profit & sustainability rules chu an zawm a ṭul bawk a, mahse, fing takin heng dan hnuaia hrem theihna pumpelh an tum a ni ber.
UEFA dan ang chuan, club-te chuan kum thum chhungin an club sum lakluh aia tam £4.4mtd thleng player lakluh nan an seng thei a, club pawisa ni lo a, club neituin ama sum a hmang a nih chuan £26.6mtd thleng an hmang thei thung.
Heng dan zawm lote hi UEFA chuan hrem theihna dan hrang hrang a nei a, warning a pek piahlamah, a duh chuan sum chawitirin, European nomawi an lo chawi tawh thlengin a hlihsak thei a ni.
Hriat tel tur erawh, nikum June khan UEFA hian FFP dan thar a lo duang tel tawh tho a, mahse, hei erawh thawklehkhata hman tur ni loin, zawi muanga kum thum chhunga tihhlawhtlin tura tih a ni - season kal laiah hman a la ni lo.
UEFA dan thar ang chuan club chuan hlawh, transfer leh agent fee-ah te club sum lakluh aṭanga 70% bak an hman a rem lo a, kum thum chhunga club-in sum an hloh theih zat chu £49.96mtd a ni bawk.
He dan hi 2023-24 season aṭanga hman ṭan tur niin, a hman ṭan kumah club-te chuan club sum lakluh aṭanga 90% chu hlawh, transfer leh agent fee-ah te an hmang thei a, 2024-25-ah 80% niin, 2025-26 ah 70% a ni ang.
Premier League dan bikah chuan kum thum chhungin club-ten £105mtd aia tam an hloh a thiang lo a, hei aia tam an hloh a nih chuan sum chawitir emaw, point paihsak thlengin hrem theih an ni.