Bayern Munich-in kuminah chak hmel an la hmu thei lo. Julian Nagelsmann-a hote hi RB Leipzig nen an inhnehtawk hnuah FC Cologne nen 1-1 in an inhnehtawk leh a, Thawhlehni zanah phei chuan Bavarians hi a suttu zawk an ni. 
Allianz Arena-ah Cologne-in Ellyes Skhiri hmangin minute lina lekah goal an khung a, Bavarians goal khung an harsat. Minute 90-naah Joshua Kimmich-a'n hla tak aṭangin kawh zetin a pet goal a, Bayern-in point khat hlu tak an hlawh chhuak.
Cologne phur
Bundesliga table thlir chuan FC Cologne hi 10-naah an awm a, point 21 an hmu. Amaherawhchu Cologne hian kum bul an ṭan ṭha a, Werder Bremen 7-1 in an sawp. Steffen Baumgart hote hian Allianz Arena-ah pawh an chet ṭhat an chhunzawm a, ṭan phatah an pet goal nghal.
Minute lina lekah Florian Kainz corner pet chu Julian Chabot-a'n tauh pialin kum 27 mi Ellyes Skhiri-a'n goal-ah a chantir. Team ṭha lo zawka ngaihin goal an khung hmasa a, Cologne-in goal venhim hna an thawk nghal.
A tawpah Kimmich
Bayern-in chance ṭha insiam an harsat a, goal venhim hna thawk zawk Cologne-in counter attack hmangin chance an insiam zeuh zeuh. Second half-ah Thomas Muller rawn lutin a hun ṭha neih chu goal-ah ṭha zetin tauh mah se keeper Marvin Schwabe-a'n a dang ṭha hle.
Minute 90-naah Kimmich-a'n a theihna a rawn pholang a, yard 20 aṭangin kawh zetin a pet goal. Keeper Schwabe dem theih a ni lo a, Bayern laka Cologne point thum hmuh beiseina a tawp. Team pahnihin point khat ve ve an hlawh chhuak.
An ṭha tawk lo
Bayern Munich tan insiamṭhatna tur a tam hle. Tlarhnung lam player Dayot Upamecano, Matthijs de Ligt leh Alphonso Davies ten pass sual an ngah a, tlarhma lama awm Serge Gnabry, Jamal Musiala, Leon Goretzka leh Leroy Sané te hun pawimawhah an in pass dik chuang lo.
A tawpa goal khungtu Kimmich pawhin tlarhnung a thlawp ṭha tawk lo a, Bayern tlarhnung laia ding Dayot Upamecano leh Matthijs de Ligt ten hna an ngah phah hle. Sadio Mane la inhliam mah se striker Eric Maxim Choupo-Moting thlawp turin Leroy Sane, Jamal Musiala leh Serge Gnabry te an awm a, midfield-ah Kimmich leh Leon Goretzka te an awm.
Striker tih loh chu Germany team nen danglamna a awm lo a, World Cup 2022-a Germany ṭhat tawk loh avang chiahin tun dinhmunah Bayern an ṭha tawk lo. Nagelsmann-a'n season ṭha tak hman a duh a nih chuan a insiamṭhat ran a ngai a, Ferbuary 14 zana PSG nen Champions League last 16 first leg an khelh hma ngeiin an khelh ṭhat hman a ṭul a ni.
Bayern umtu Leipzig
RB Leizpig-in table mawngphaha awm Schalke chu 6-1 in an sawp a, nomawi inchuh kawnga Bavarians elpui tur zinga mi an ni dawn. Marco Rose-a hote hian point 32 an hmu tawh a, khelh zat inangah Bayern hi point li chauhin an pha lo. 
Schalke lakah Andre Silva-a'n goal hnih a khung a; Benjamin Henrichs, Timo Werner, Dani Olmo leh Yussuf Poulsen ten goal khat ṭheuh an khung bawk. Bayern hi an che ṭha lo zel a nih chuan kum dang zawng aiin Bundesliga nomawi inchuh hi a nung ang.