Lazio lakah Milan an mualpho

Serie A champion lai AC Milan chu Lazio khelmualah 4-0 teh meuhin an mualpho a, league nomawi an kawl lai humhim tur chuan hna a hautak dawn ta hle - hmahruaitu Napoli chu point 12 zetin an phak lo ta.

Thawhlehni zan Serie A inkhel pakhat awmah, mualneitu Lazio tan Sergej Milinkovic-Savic, Mattia Zaccagni, Luis Alberto leh Felipe Anderson ten goal khat ṭheuh an khung a, mikhual team lamin an chhanletna tur an nei lo.

Milan tan midfielder Ismael Bennacer chuan goal khat a sut ṭhen teuh viau, mahse a freekick pet ṭha tak mai chu goal ban dinglam sirah chiah a liam a. Rome khawpuia inbeng bel Laizo erawhin hliam vangin striker Ciro Immobile chhawr thei lo mah se goal an khung thei hle.

Lazio tana goal hmahruai khungtu Milinkovic-Savic chuan, "Tun hnaia kan khelh anga ka khel zel thei a nih chuan sang tak kan thleng thei ang. Tunah pawh champion lai lakah ṭha takin kan khel thei a, hei hian kan theihna san zia a ti fiah.

"Coach Maurizio Sarri hian inrintawkna sang tak min siamsak mek, chu chuan khelmual pawn leh chhung lamah rah ṭha a chhuah," tiin a sawi a, season thara Champions League khelh phak ngei an tum thu a sawi bawk.

League match 19 aṭangin Lazio hian point 37 an hmu tawh a, table-ah pathumna an ni mek. Hmahruaitu Napoli nen an inkarah point 13 a awm tawh, champion chu sawi ngam chi a ni rih lo - a sang pali zinga tel tur erawhin rinkai zinga mi an ni.

Chak lo Milan coach Stefano Pioli chuan, "Milan kan nihna hi a rang thei ang berin kan lantir leh nghal tur a ni ang. Siamṭhat ngai lai tam tak ka hmu, chumi tih fel chu ka hna a ni a, a tifel theitu chu player lam an ni thung.

"Kan ruahmanna hrang hrang a hlawhtling thei lo kha a pawi, khualmualah kan tlawm a ni satliah lo a, goal li lai chhuahin kan khung ve miah lo, a tir aṭanga a tawp thleng khan thil kan ti dik hleithei lo a ni ber mai.

"Hmahruaitu nena kan inkar a zau ta hle, theih ni se chuan sawr zim kan duh. Kan inkar zau viau tawh mah se kan beidawng thiang lo, season chanve chauh kan la hman avangin kan tho chhuak leh thei a ni tih kan hriat a ngai," a ti.

Thawhṭan zan Serie A inkhelah Inter Milan chu an mikhual Empoli lakah 1-0 in an lo tlawm tawh bawk a, season dang angin Milan khaw club pahnih an che ṭha tawk lo a, an tan champion a harsa tawh ang.