LeBron James chuan NBA huangah match khat chhunga 3-points a neih hnem ber ṭum a tawng a, vawi kua vawm lutin a team Los Angeles Lakers chu Los Angeles Clippers lakah 133-115 in hnehna a chanpui.
James-a'n point a neih zawng zawng hi 46 a tling a, tun hnaiah a khel ṭha hle. Clippers lakah James-a'n sulhnu a nei ṭha tawk lo, tun hnai kum 20 chhungin Clippers a hmachhawn bika point 40 a neih tlin vawi khatna a ni hial.
NBA point nei hnem ber Abdul-Jabbar (38,387 points) a hnaih chho mek zel, point 177 chauhin a phak lo ta, playoff an khel phal a nih phei chuan tun season chhungin baksetball inelna sang bera point nei hnem ber record a siam hman a rinawm.
Clippers lakah hian James a khel ṭha fal, a ṭhiante zingah point 20 nei tling thei an awm ve lo. Point 17 neitu Russell Westbrook leh Thomas Bryant (15 points) te chuan an thawh hlawk ve bawk.
Western Conference table-ah Lakers hi 13-na an ni mek, vawi 22 chak tawh mah se ṭum 26 ngawt an tlawm tawh. Playoff khel phak china awm Utah Jazz chu ṭum 25 an chak tawh thung, a thiam pariat zinga tel turin kawng a la awm.
Thawhlehni inkhelah Boston Celtics an chak lo. A zawna match kua zet an chak hnuah Boston hian Eastern Conferrence table mawng lama talbuai lai Orlando Magic chu 113-98 in an ngam lo - Magic tan Paolo Banchero chuan point 23 a nei a ni.
Nimin khan Celtics hian Miami Heat an hmachhawn zui a, inkhel inhnehtawk takah 98-95 in an chak lo, an match hnuhnung pahnihah an tlawm tihna a ni. Zirtawpni zingah New York Knicks nen an inhmachhawn leh ang.
Giannis Antetokounmpo hliam a dam tawh, khup hliam vanga match nga a chawlh hnuah rawn kir lehin point 29 a nei a, a team Milwaukee Bucks chu Detroit Pistons lakah 150-130 in hnehna a chan pui.
Antetokounmpo awm loh hlanin Bucks hian match nga an khel a, ṭum thum ngawt an tlawm. A lo kir leh hnuah erawh Bucks an chak leh nghal. Greek tlangval chuan, "Inkhel thei loa awm kha a hrehawm, tunah chuan ka hlim ve leh ta," a ti.
Inkhel dangah Jalen Green chuan baksetball a khelh chhunga a point neih hnem ber ṭum a tawng, point 42 ngawt neiin Houston Rockets chu Minnesota Timberwolves lakah 119-114 in a chakpui a, match 13 an tlawm zawn tawhna an ti reh bawk.