Rohit leh Gill ten century an siam

India chuan an mikhual New Zealand lakah zahngaihna an lantir lo a, ODI match thum khelhah an hneh vek. Thawhlehni khan match hnuhnung ber hi khelh a ni a, India opener Rohit Sharma leh Shubman Gill ten century siam ve vein 90 runs-in an chak.

Holkar Stadium, Indore-ah New Zealand-in vawm hmasak an thlang. Rohit-a'n 101 runs a siam bakah Gill-a'n 112 runs a siam a, India opener-te inkawp hian 26 overs-ah 212 runs an siam hman hial.

India-in bul an ṭan ṭha a, Virat Kohli (36 runs) leh Hardik Pandya (54) ten runs rawn siam belhin over 50-ah 385 runs an siam. New Zealand tan target a sang mah mah a, opener Devon Conway-a'n 138 tehmeuh rawn vaw chhuak ve bawk mah se over 41.2-ah 295 runs siamin an thi fai vek.

Indian bowler Shardul Thakur (45/3) leh Kuldeep Yadav ten wicket thum ve ve an la a, Thakur hian 25 runs siam bawkin player of the match-ah thlan a ni. Player of the series-ah Shubman Gill thlan a ni a, ani hian match hmasa berah double century (208) siamin match hnihnaah pawh thi loin 40 runs a siam a, tun ṭumah hian 112 runs a siam leh bawk.

Kum 23 mi Gill hian kum 2019 aṭang khan ODI a khel ṭan a, match 21 lek aṭangin century vawi li a siam tawh a ni. India leh New Zealand hian January 27, Zirtawpni aṭangin T20 match an khel leh ṭan ang.