FA Cup fourth round khel tur a hriat kim

Thawhlehni zan khan FA Cup third round replay-ah Accrington Stanley-in Boreham Wood 1-0 in an hneh a, team 32 awmna fourth round an lut. League One club Accrington hian Inrinni zan hian Premier League club Leeds United an hmachhawn ang.

Wham Stadium-ah Accrington-in hnehna chang turin extra time khelh an mamawh a, minute 97-naah Tommy Leigh-a'n penalty aṭangin goal awmchhun a khung. FA Cup-ah hian seeded a awm lo a, an pawh hmasa zawk khelmualah an inkhel ṭhin.

Minute 90 chhunga chak zawk an awm lo a nih chuan hming hnuhnung zawk khelmualah replay an khel a, hun pangngaiah an inhnehtawk leh a nih chuan extra time a awm tawh thung. Extra time zawha an inhnehtawk a nih chuan penalty shootout hmanga chak zawk zawn tur a ni.