Man City khelmualah Arteta-a Arsenal

Pep Guardiola-a enkawl Manchester City chuan zanin dar 1:30 hian Arsenal an lo mikhual dawn. Inelna hi FA Cup fourth round a ni a, a chak lo zawk tlak nghal tur a ni - inkhel a hmuhnawm ngei ngei ang tih a sawi ngam.

Premier League hmahruaitu chu Gunners an ni a, champion lai chu Man City an ni thung. Anni pahnih hi tun season league champion tuma inel na tak an ni a, zanin match hi league ni lo mah se inelna an ngai pawimawh ang.

Citizens tan chuan Arsenal hneh a pawimawh, tournament aṭanga paihthlak ringawt a ni satliah dawn lo, an chak tluang leh boruak ṭha tih chhiat theihna remchang a ni. Arsenal tan pawh City hneh chu inrintawkna sang lehzual zawk siam theihna a ni dawn.

A ṭha ber

Arsenal manager Mikel Arteta chuan tun dinhmunah Manchester City chu khawvela team ṭha ber an ni, a ti a, Assistant Manager nia hun a lo hman tawhna club hi a thinlung takin a fak nge an rilru tih danglam nan a sawi mai tih hriat a harsa.

Arteta chuan, "Inkhel hautak a ni dawn, ka ngaihdan chuan khawvela team ṭha ber an nih avangin kan tan fiahna hautak tak a ni ang. Inkhelh hlan ka nghakhlel hle, a chhan chu kan ṭha tawk ve tawh em, tih fiahna a ni dawn.

"FA Cup leh Premier League erawh a boruak a danglam, khelmual chhunga player lut an danglam vang pawh a ni thei a, match khelh dan a inang lo leh dawn. Kan tan chuan season hman hmabaka inrintawkna min siam theitu a nih ka beisei," a ti.

Etihad Stadium-a hun a hman laiin Arteta hian Premier League nomawi pahnih bakah FA Cup pakhat leh League Cup pahnih a chawi. Arsenal a enkawl hnuah FA Cup a la tawh a, knockout football inelna upa berah hian tawnhriat chu a nei ṭha viau.

Kum 40 mi Arteta hian, amah chher hriamtu Man City manager Guardiola chu a nuna mi pawimawh a ni tih a sawi a, inkhel boruakah eng pawh thleng ni se an mimal nun inkarah nghawng a neih loh tur thu a sawi tel bawk a ni.

Insiksawi hun

Manchester City hian squad an nei chhah ṭha tawk a, an duh a nih chuan zaninah pawh squad an siksawi thei leh viau ang. Kevin De Bruyne, Joao Cancelo leh Aymeric Laporte te tel loin Tottenham an hneh thei, forward Phil Foden chu kartawp inkhelah an awltir bawk.

Striker Erling Haaland, keeper Ederson leh De Bruyne te hi dinhmun nghet luah chiang an ni a, midang chu a rem huna siksawi leh tih danglam theih reng an ni hlawm, anni pathum meuh pawh hi bench lamah dah chang an awm tho.

Spanish manager Guardiola-a'n Arsenal hneh a duh dawn, chutihrualin league bakah Champions League last 16 khelh hmabak an nei chho dawn, player ṭhate hi chau tawngkhawng thei an nih avangin ṭhenkhat chu a siksawi ngeiin a rinawm.

Arsenal pawhin an neih ṭhat zawng zawng an thawhchhuah pui a rinawm loh. Brighton aṭanga an lak thar Leandro Trossard chuan North London tan a vawi khat nan inkhel bul a ṭan a rinawm - Manchester United lakah khan bench aṭangin a lo lut tawh bawk.

Arteta-a'n defender thar Jakub Kiwior a nei bawk a, Poland international pawh hi Citizens lakah a inlan a rinawm. Chutihrualin eng inkhelah pawh chak loh chuan nghawng a nei na ṭhin tih a hrechiang a, chak tumin a naute a remkhawm ang.

Ngaihnawm

*Man City hian inelna hrang hranga Arsenal an hmachhawn hnuhnung 16-ah vawi 13 hnehna an chang thei, vawi hnih tlawmin ṭum khat chu an inhnehtawk. An chak lohna pahnih hi FA Cup-ah a ni thung.

*Arsenal hian Man City nen FA Cup an khelh hnuhnung paliah hnehna an chang vek a, final an lut zui vek bawk. Final vawi li an luhah hian ṭum thum (1971, 2017 leh 2020) an champion.

*Man City hian an khelmuala FA Cup an khelh hnuhnung pakuaah hnehna an chang vek a, heng inkhelah hian goal thum an khung tling vek - an goal khung belhkhawm hi goal 40 a tling hial.

*FA Cup bikah chuan Arsenal hian a zawnin Premier League club an hneh lo ngai meuh lo, kum 2011 hnu lamah hetiang hi an la tawng leh lo. Kum 2021 khan fourth round-ah Southampton an hneh lo, an chak lo leh a nih chuan 2011 hnua a vawi khatna a ni ang.