Final khel tur Elena Rybakina

Wimbledon champion Elena Rybakina chuan Grand Slam nomawi dang neih belh theihna remchang a nei dawn. Nimin khan Victoria Azarenka hnehin Australian Open 2023 final a lut.

Rod Laver Arena-a inkhelah kum 23 mi Rybakina hian 7-6 (7-4), 6-3 in hnehna a chang a, chak tur hian darkar khat leh minute 41 chhung hun a hmang, a khingpui service ṭum nga ngawt a chhuhsak thei a ni.

Kazakh nula Rybakina hi a tirah a cheṭha nghal pur pur bik lo, a service pawh a hloh - mahse set khatna tawp lam aṭangin a dingnghet ṭha em em a, set hnuhnung zawkah phei chuan harsatna lian tham a tawk tawh lo.

Seeded 22-na Rybakina chuan, "Ka tan chuan Australian Open final meuh luh chu thil lawmawm tak a ni. Tun hmain Wimbledon title ka la tawh a, ka ngaihlu hle. Tun inelna pawh hi ka ngaihlu takzet.

"Nipui boruak a ni a, a nihna takah chuan khua a lum avangin inkhelh a awlsam lo. Mahse, inelna lianah tawnhriat ka lo nei ve tawh a, chu chuan nasa takin min pui," a ti a, major tournament final a khelh vawi hnihna tur chu a nghakhlel hle bawk.

Season hmasa khan Wimbledon-ah Russia leh Belarus player tel an phal lo, hei hi Russia leh Ukraine indo vang a ni. Hei vang hian grass court inelna lian hi a pangngaia khelh ni mah se ATP leh WTA chuan ranking point an pe lo.

Wimbledon champion Rybakina pawhin point a hmuh belh lo a, a ranking a san phah thei chuang lo. Season hmasa khan world number 20 pawh ni phak lo chungin US Open a khelh a ngai a, a tan thil a harsat thu a sawi.

Grand Slam champion dangte ang lo takin a thawm pawh a lian lo. A nihna takah chuan Australian Open an khelh dawn pawh hian hming langsar a ni lem lo bawk, mah se a theihna sang tak chu thup theih a ni lo.

Australian Open-ah hian final thleng turin match ruk a khel a, heng inkhelah hian set khat chiah a hloh - a kalkawngah hian world number 1 Iga Swiatek pawh a hneh. Final-ah chuan Aryna Sabalenka leh Magda Linette inkhela chak zawk a hmachhawn leh ang.