Aizawl FC-in Mohammedan lakah phuba an la

27th January, 2023

Nimin tlai khan I League inkhelah Aizawl FC-in Henry Kisseka penalty hmangin Mohammedan SC 1-0 in an hneh. Mizo club-in point thum hlu tak an hlawhchhuah avangin palinaah an invawrhchho bawk.

Kolkata-ah Mohammedan SC-in injury time minute 12-naah siphurh sutna goal an khung a, RG Stadium-ah erawh Mizo club-in hnehna an chang ta.

Mizo an ṭhahnem

Aizawl FC tan Mizo pakuain bul an ṭan a, Mohammedan tan keeper Zothanmawia leh Vanlalzuidika Chhakchhuak ten bul an ṭan ve bawk.

First half-ah goal chance hmuh tur ṭhahnem mah se goal hmuh tur a awm lo. Aizawl FC forward R. Ramdinthara'n a chance ṭha neih a hmang ṭangkai tawk lo a, Henry Kisseka pawh goal hmaah a vannei bik lo.

Goal khat a tawk

Second half-ah inkhel a nung lehzual a, goal chance hmuh tur pawh a ṭhahnem lehzual. Mohammedan-in AFC tlarhnung an tibuai a, goalkeeper Lalmuansanga'n a hna a thawk ṭha tlat.

Chutihrualin mahni muala khel Aizawl FC-in chak phu khawpin an khel ṭha a, an hun ṭha neih an khung theih loh hnuah Henry Kisseka-a'n a penalty hlawhchhuah chu minute 67-naah a khung.

AFC midfielder Matias Veron-a'n goal khung belh theihna tur ṭum hnih ngawt a hlah a, keeper T. Mawia'n a dang ṭha ve bawk.

A tawpah erawh Aizawl FC vanneih hun a inher chhuak a, Kean Lewis-a'n goal ban a pet per bakah Nikola Stojankovic-a'n crossbar a pet per - Mizo club an ṭang tluan. Hun tawp lamah R. Lalthanmawia mual sir lamah a hmuhnawm lehzual a, Mizo tlangval hi man of the match a thlan a ni.

Punjab hun?

RoundGlass Punjab-in vawiin tlai dar 4:30 hian Tau Devi Lal Football Stadium-ah Real Kashmir an mikhual dawn. Punjab hi league hmahruaitu an ni a, pakhatna dinhmun sawhnghet turin chak a pawimawh.

Nikum December 12 khan Punjab hian Real Kashmir hi khualmualah 1-0 in an hneh a, Pranjal Bhumij-a'n goal awmchhun a khung. Real Kashmir defender Pranjal Bhumij leh Akashdeep Singh Kahlon te hnawhchhuah an ni a, hremna an tawh zui avangin result-in a tuar phah hle. Table chung lam aṭangin table laihawlah Kashmir club hi an tla thla a, table chunglama awm leh turin Punjab club hi an ṭul ang.