Man United-in League Cup final an hnaih

Manchester United chuan Nilaini zan khan khan Carabao Cup semifinal first leg-ah Nottingham Forest 3-0 in an sawp a, Old Trafford-ah second leg khelh tur la awm mah se Wembley Stadium an thlen ngei a rinawm ta hle.

City Ground-ah Marcus Rashford-a'n 'solo goal' ropui a khung a, Wout Weghorst-a'n a club thar tana a goal hmasa ber khungin Bruno Fernandes-a'n chak nemnghehna goal a khung bawk.

Second leg hi February 1, Nilaini zan dar 1:30-a khelh tur a ni a, final hi February 26, Pathianni hian Wembley Stadium-ah khelh tur a ni ang. Semifinal hmasa zawkah Newcastle United chuan Southampton chu first leg-ah 1-0 in an hneh a, Magpies dinhmun ṭha zawk mah se Saints tan beisei tur a la awm.

Rashford a bawn

Manchester United forward Marcus Rashford hian theihna sang tak a nei a, tun hnaiah a theihna sang tak hi a takin a lantir chho mek. United striker hlui Louis Saha phei chuan Kylian Mbappe nen an danglamna chu World Cup nomawi chawi a ni tiin Rashford leh French forward te chu intluk renga a ngaih thu a sawi hial.

France international hlui Saha hian thu a uar hret angin ngaih theih mah se tun hnai bik thlir chuan a thusawi hi a pawmawm hle. Rashford hian World Cup zawh aṭang khan Crystal Palace lakah chiah a goal a khung lo. English striker hian Premier League champion lai Manchester City leh hmahruaitu ni mek Arsenal lakah pawh goal a khung vek a, match 10-ah goal 10 a khung.

City Ground-ah hian Rashford-a'n minute rukna lekah halfway line thlen hma aṭanga ball khalh ṭanin Forest player Remo Freuler leh captain Joe Worrall te inkarah khalh lutin chiang zetin a pet goal. Rashford-a goal hi 1999 FA Cup semifinal replay-a Arsenal laka Ryan Giggs-a goal ropui nena khaikhin pawh thil awm lo a ni hran lo.

An famkim lo

Man United hi chiang taka chak angin lang mah se VAR puihna dawng lo se chuan talbuai ve thei an ni. Forest hian Sam Surridge hmangin siphurh sut angah an inngai a, amaherawhchu VAR hmanga enlet a nih hnuah English striker hi a offside.

Forst midfielder Gustavo Scarpa pawhin goal-ah ṭha takin a pet a, keeper David de Gea-a'n a dang. Man United-in Arsenal lakah goal thum an chhuah a, Palace lakah an clean sheet lo bawk. Forest lakah Man United hi clean sheet mah se Ten Hag-a'n tlarhnung rem phui kawngah ṭan lak a la mamawh hle.

Weghorst leh goal

First half tawp hma hretin Antony ball pet chu Forest keeper Wayne Hennessey-a'n dang mah se a per chu Wout Weghorst-a'n goal-ah a chantir. Dutch striker Weghorst-a'n goal danglam bik khung lo mah se United tana goal hmasa ber a khung hian inrintawkna a pe ngei ang.

Ten Hag chuan, "Weghorst tan goal khung hi a pawimawh a, inrintawkna a neih phah ang. Crystal Palace leh Arsenal lakah khan hna ṭha tak a thawk. A chet dan dik avangin Palace lakah Bruno-a'n goal a khung a, Rashford-a'n Arsenal laka a khung theih nan defender a hruai peng bawk. Mahse, striker chu goal khung tur an ni a, goal an khung loh chuan an lawm ṭhin lo," tiin a sawi.

Team ṭha zawk United

Man United-in first half-ah goal hnih an nei tawh chungin second half-ah a chungnung zawk an ni a, Christian Eriksen-a'n crossbar a pet per a, an phu angin Bruno Fernandes-a'n a khung belh leh bawk.

Minute 89-naah substitute Anthony Elanga ball pek chu Fernandes-a'n ṭha zetin a pet goal. Khualmualah Man United chiang takin an chak a, Old Trafford-ah hahdam zawkin an khel thei ang.

Man United hian January 28, Inrinni zanah Reading nen FA Cup fourth round an khel dawn a, February 1, Nilaini zanah second leg hi khelh leh tur niin kartawpah Crystal Palace an mikhual chhunzawm dawn. Ten Hag-a hote hian inelna paliah nomawi beiseina an la neih vek avangin khelh tur an ngah bik a ni.