Russian infiammite tan kawng an hawng

International Olympic Committee (IOC) chuan Russia leh Belarus infiammite tan Paris Olympic khelh theihna kawng a hawnsak a, mahse heng ram pahnih aṭanga infiammite hi an ram hminga inlan loin, mimal hminga an tel a ngai thung dawn a ni.

Russia leh Ukraine an indo a, he thil thlengah hian Belarus chuan Russia hi a pui - khawvel ram dang tam takin Ukraine an pui thung. Ram pahnih inrem lohna hi thu chuan thui tak a kal tawh, tharum thawh hmasatu Russian hian khawvel dem a hlawh.

Infiamna peng hrang hrangah Russia hi hrek an ni a, an ram infiammite hi khawvel mai bakah Europe khawmualpui huap ang pawhin an inlan thei meuh lo a, chutihrualin infiamna peng ṭhenkhatah erawh an inlan thei leh ṭan tawh.

Russia hmingin inlan thei lo mah se 'neutral athlete' an ni mai a, mimal hming a nih tawh chuan kawng a inhawng ṭhin. IOC pawhin ram hming ni loa inlan thei leh inlan phak tan chuan kawng a hawnsak dawn ta a ni.

Nikum Dcember thla khan IOC president Thomas Bach chuan, indona chuan infiammite nghawng lo se a duh thu a lo sawi tawh a, infiamna huangah chuan a theih chinah politics lakluh loh an tum.