Chak ngei ngei a ngai - Lianzuala

Indian Super League hmahruaitu Mumbai City chuan zanin dar 7:30 hian Jamshedpur FC chu khualmualah an lenchilh dawn a, Mizo tlangval Lallianzuala Chhangte chuan an hmahruaina chhawm nung tura chak ngei ngei an mamawh thu Vanglaini a hrilh.

Lianzuala chuan, "Kan chak ngei ngei a ngai a, match hnih a zawna kan chak leh chuan, league hmahruaitu ni chunga season kan khar mai ka ring a ni," a ti.

Mumbai City hian league match 15-ah point 39 nei tawhin, an hnuai chiaha awm Hyderabad FC aiin point liin an sang zawk - match nga hmabak an la nei.

ISL danah league round-a hmahruaituin AFC Champions League an khel ṭhin a, champion tur erawh top four chinin playoff khelin an zawng ṭhin.

Mumbai hian tun season-a goal riat khung tawh Lianzuala bakah hian Lalengmawia Ralte (Apuia) an kawl a, Mizo tlangval pahnihin zanin inkhel tur atan harsatna an nei rih lo.

Jamshedpur hian Mizo defender pathum Ricky Lal-lawmawma, Laldinliana Renthlei leh Laldinpuia Pachuau an kawl bawk a, JFC-a hmun pawimawh chang phak vek an ni.