Spurs forward thar Danjuma

Tottenham Hotspur chuan Netherlands forward Arnaut Danjuma chu loan hmangin Villarreal aṭangin an lalut a, an inrem dan chuan tun season tawp thleng atan an hawh rih phawt dawn a ni.

Tun thlasik bazar chhungin Spurs hian Danjuma hi an player lakluh hmasak ber a ni. Everton nen sawizawm an ni a, zawm ngei tur angin lang hman mah se North London lam a pan ta zawk.

Danjuma hian tun hmain Bournemouth tan 2019-2021 khan a lo khel tawh, match 52 a khelh aṭangin goal 17 a khung - chumi hnuah English club aṭang hian La Liga club a zawm ta a ni.

Netherlands tan match ruk a khelh aṭanga goal hnih khungtu Danjuma chuan, "Tottenham-in min lakluh an duh tih ka hriat khan, keima lamah chuan buaina a awm lo. Team ropui an nih bakah coach ṭha takin a enkawl an ni," tiin a sawi.

Antonio Conte-a'n tlarhma lama khel turin Harry Kane, Son Heung-min, Dejan Kulusevski, Richarlison leh Lucas Moura te a nei sa a, anni elpui turin Danjuma a neih belh, khel phak tur chuan Danjuma hian a beih ngawrh a ngai hle ang.