Bournemouth-in Randolph leh Vina an la dawn

Premier League club Bournemouth-in thlasik transfer an chhawr ṭangkai zel a, West Ham aṭanga goalkeeper Darren Randolph chu a ngheta lalut turin inremna an neihpui a, AS Roma defender Matias Vina chu season tawp thleng atan loan-in an hawh dawn bawk.

Republic of Ireland tana vawi 50 inlan thei Randolph hian January 2020 khan Middlesbrough aṭangin Hammers a zawm a, mahse, London club tan match 10 chiah khelin, May, 2021 hnuah a inlan leh tawh lo.

Kum 35 mi goalkeeper hian Hammers-ah thla 18 dang cham turin contract la nei mah se chhuahsan a thlang zawk a, khelhna hmun chan beiseiin Bournemouth a zawm dawn.

Bournemouth tan hliam vanga a chawlh hnuah first-choice keeper Neto a lo kir ve leh tawh a, Randolph nen hian hmun pawimawh chan tumin an inel ang.

Roma aṭanga loan-a an hawh Vina hi World Cup 2022-ah khan Uruguay tan a feh chhuak a, mahse, Qatar aṭanga a kir hnuah Italian club tan Serie A match khatah chiah bul a la ṭan.

Kum 25 mi left back Vina hian Jose Mourinho hnuaiah hmun pawimawh chang phak lo mah se Uruguay tan pawha vawi 28 lo inlan tawh a ni a, kum 2019 khan Uruguayan Primera División Player of the Year-ah hial thlan a lo ni tawh.

Vina hian Brazilian club ṭha Palmeiras tan South American Champions League an tih mai, Copa Libertadores-ah nomawi vawi hnih ngawt a lo chawi tawh bawk a, a kum zat ngaihtuahin tawnhriat a nei ṭha hle.

Bournemouth neitu thar Bill Foley-a'n December 2022-a Cherries a lei khan transfer bazar-ah squad a thuam chhah tur thu a sawi a, a intiam ang ngeiin hna a thawk ṭan.

Thawhlehni khan Sene-gal forward Nicolas Jackson chu Villarreal aṭanga pound maktaduai 20.3-a lei turin inremna an neihpui tawh a, French club Lorient aṭangin Burkina Faso winger Dango Ouattara chu pound maktaduai 20-in an la tawh bawk.

Bournemouth hi Premier League table-ah 18-na an ni mek a, February 4, zan dar 8:30 hian Brighton & Hove Albion an lenchilh ang - relegation zone aṭanga talchhuah ngei tumin an bazar nasa hle.