Copa del Rey: Barcelona-in semifinal an lut
Spanish football-a inelna ngaihhlut hlawh Copa del Rey quarterfinal-ah Nilaini zan khan Barcelona chuan hnehna an chang a, an mikhual Real Sociedad chu 1-0 in an hneh.
Barcelona tan Ousmane Dembele chuan inkhela goal awmchhun a khung a, minute 40-naa Brais Mendez hnawhchhuah a nih avanga player 10-a khel Real Sociedad-in a chhanletna tur an nei lo.
Nilaini zan quarterfinal inkhel dangah Osasuna chuan 2-1 in Sevilla an hneh a, Osasuna tan Ezequiel Avila leh Abde Ezzalzouli ten goal khat ve ve khungin, Sevilla tana Youssef En-Nesyri goal khung chu scoreline cheimawina chauh a ni.
Nizan khan Copa del Rey quarterfinal inkhel dangah Valencia vs Athletic Bilbao leh Real Madrid vs Atletico Madrid an intawng a, he thu buatsaih a nih lai hian result kan hre hman lo.
Beiseina thamral
Real Sociedad-in inelna hrang hranga an match hnuhnung pakuaah hnehna an chang vek a, 2019-20 season-a Copa del Rey nomawi lo chawipui tawhtu Imanol Alguacil kaihhruaina hnuaiah season duhawm tak an hmang.
La Liga lamah pawh Real Sociedad hi Barcelona leh Real Madrid tana hnawksak pha ber an ni a, table-ah pathumna an ni - pakhatna Barca chu point ruk chauhin an phak lo a, match khatin an khel tam thung.
Copa del Rey quarterfinal-ah pawh Real Sociedad-in Barca mut titui lotu nih an duh a, an beisei ang erawhin thil a kaltluang lo - minute 40-naah an thiampuipa Brais Mendez chu hnawhchhuah a ni.
Kum 26 mi attacking midfielder hian tun season inelna hrang hrangah match 28 khela goal 10 khungin, assist vawi sarih a nei thei. Mahse, Sergio Busquets laka hlauhawm taka a chet avangin red card pek a ni a, Barca dinhmun a ṭha sawt.
A hming Dembele
Nou Camp-ah first half chhungin goal a lut lo a, second half-ah erawh engkim tih danglamin a awm. Minute 52-naah Dembele chuan Jules Kounde ball pek chu um lutin, goal-ah a chantir a, 1-0 a ni.
Xavi enkawlna hnuaia harhtharna chang mek Dembele hi tun season-ah Barca tan player langsar a ni a, a ṭangkai ṭhin takzet - match 27-ah goal riat khungin, assist vawi sarih a nei leh der tawh.
Barcelona tan Gavi chuan goal dang khung belh theihna remchang nei mah se a chhawr lo a, Spanish midfielder ṭhangduang hian bar a tihper.
Mahse, kim loa khel Sociedad-in awmze neiin Barcelona an nawr thei tawh lo a, a tawpah mualneitu Catalan club hi 1-0 in an chak. Barca hi 2020-21 season kha Spanish Cup nomawi an chawi hnuhnung ber a ni a, season khat an awl hnuah nomawi chawi leh ngei an duh ang.
Aw... Sevilla!
Spanish club langsar pawl ni ṭhin Sevilla-in season duhawm lo tak an hmang mek a, La Liga-ah phei chuan relegation zone aṭanga an himna chu point khat chauh a ni.
Mahse, tun hnaiah an insiamṭha - Copa del Rey quarterfinal lut tur hian Alaves chu 1-0 in an hneh a, kartawp La Liga inkhelah khan 1-0 in Cadiz an hneh zui bawk. Tun season-a a zawna an chak vawi khatna a ni hial.
Sevilla fan-te an phur ve dawn chauh a, mahse, an chak zo lo lehnghal. Osasuna tan Ezequiel Avila chuan minute 71-naah goal hmahruai a khung a, 1-0 hian an chak mai dawna a lan laiin Sevilla tan Youssef En-Nesyri chuan hun pek belhah si phurh sutna goal a khung.
Extra time khelh zui a ni a, mahse, Sevilla an 'comeback' tluan tling thei ta chuang lo - Osasuna-in Barcelona aṭanga loan hmanga an hawh winger Abde Ezzalzouli chuan extra time-ah goal a khung ve leh a, 2-1 in Osasuna an chak.