Wolves-in goalkeeper thar an nei

Premier League club Wolverhampton Wanderers chuan goalkeeper Dan Bentley chu Championship club Bristol City aṭangin an lalut a, a man zat hi tarlan a ni lo - kum hnih leh a chanve cham turin contract a ziak.

Kum 29 mi keeper hian top flight league a la khel ngai lo a, mahse, Bristol tan match 124 zet khelin, Brentford tan a lo khel tawh bawk a, tawnhriat a nei ṭha tawk.

London Football Awards 2018-a London Goalkeeper of the Year-a thlan lo ni tawh Bentley hian kum hnih leh a chanve atan contract ziak mah se, a contract-ah hian kum hnih dang pawhsei theihna dan a awm.

Wolves hian thlasik transfer-ah player pali ngawt an lalut ta a, Nice midfielder Mario Lemina (£9.7m), West Ham defender Craig Dawson (£3.3m) leh winger Pablo Sarabia (£4.4m) te an lo lalut tawh.

Bentley hian first-choice keeper Jose Sa leh Jackson Smith te nen Julen Lopetegui hnuaiah khelhna hmun an inchuh dawn a, Sa nekchhuah hi thil awlsam a ni lo ang.

Hetihlai hian Wolves keeper Matija Sarkic chuan Championship club Stoke City chu season tawp thleng loan-a khel turin a zawm a, kum 25 mi keeper hian tun season inelna hrang hrangah Premier League club tan match thum chiah a khel.

Wolves hi Premier League table-ah 17-na an ni mek a, relegation zone aṭanga an himna hi goal difference chauh a nih avangin an hmabak a awlsam lo hle - February 4 zanah league match khel turin Liverpool an mikhual ang.