Jazz hnehtu Blazers

Damian Lillard-a'n NBA season kal laia point a neih hnem ber ṭum (60 points) a tawng a, nimin zing khan a team Portland Trail Blazers chu Utah Jazz lakah 134-124 in hnehna a chanpui.

Lillard hian 3-points neih tuma vawi 15 a vawm zinga pakua a hlawhtling. NBA huangah 3-points hi vawi 2,292 ngawt a nei tling ta a, hemi kawnga record neih ṭhat lamah parukna dinhmun a luah ta hial.

Point 60 a neih bakah hian Lillard-a'n assist vawi riat neiin rebound vawi sarih a la bawk a, an chak theih nana tha thawh hlawk ber a ni chiang hle, an khingpui ball chan lai vawi thum a chhuhsak bawk.

Inkhel dangah Stephen Curry chu hun tawp lamah hnawhchhuah a ni a, mahse a team Golden State Warriors chuan Memphis Grizzlies 122-120 in an hneh ta tho. An hnawhchhuah hma hian point 34 chu a nei hman a ni.

Los Angeles Lakers chuan 113-104 in San Antonio Spurs an hneh. An thiampuipa LeBron James-a'n point 20 a neih bakah assist vawi 11 neiin rebound vawi kua a la bawk a, tun hnaiah James a khel ṭha thei hle.

Basketball inelna sang berah James hian point 38,230 zet a nei tawh a, point nei hnem ber Kareem Abdul-Jabbar a phak lohna chu point 157 chauh a ni tawh, record ropui biak a siam ngei dawn niin a lang.

Giannis Antetokounmpo pawhin point 33 neiin Milwaukee Bucks chu Denver Nuggets lakah 107-99 in a chakpui bawk.