Celtic striker thar Oh Hyeon-gyu

Scottish Premiership club Celtic chuan South Korean striker Oh Hyeon-gyu chu South Korean club Suwon Samsung Bluewings aṭangin an lalut a, kum nga chhung atan contract an ziahpui.

South Korea tana vawi khat inlan tawh striker hi a man zat tarlan a ni lo a, Celtic manager Ange Postecoglou chuan, "Ka striker duhzawng tak a ni a, kan khelh danah a ṭangkai khawp ang.

"Player naupang, theihna nei sang tak, team tana thawhhlawk tak tur a ni. Oh hi ka lo thlithlai reng tawh a, hlawhtlin duha tuihal, hmasawn leh hlawhtlin duh reng, chona thar hmachhawn châk tak a ni," tiin a striker thar chu a fak.

Oh-a hian season hmasa khan Suwon Samsung Bluewings tan match 38 khelin, match 26-ah bul a ṭan a, goal 14 khungin K- League aṭanga relegate thei dinhmun aṭangin a team a chhanhim.

Celtic boss Postecoglou hi Australia coach hlui niin, A League club leh Japanese club Yokohama F. Marinos te pawh lo enkawl tawh a ni a, a player lak danah Asia lam a hawi nasa hle.

Scottish club hian tun dinhmunah Japanese centre back Yuki Kobayashi, Australian midfielder Aaron Mooy, Japanese midfielder pathum Yosuke Ideguchi, Tomoki Iwata leh Reo Hatate, Japanese forward Kyogo Furuhashi leh Daizen Maeda te chu Asian Football Confederation hnuaia ram player an kawlte an ni a, tunah Oh an neih belh leh ta bawk.

Hetihlai hian Japanese striker Kyogo Furuhashi chu Celtic tan tlarhmaa an player rinrawl leh langsar a ni a, tun season-ah ringawt match 29 khela goal 20 khungin, assist vawi hnih a nei tawh.

Scottish Premiership khelh mekah Celtic hian match 22 khelin, point 61 an nei a, hma an hruai mek - an hnuai chiahah hian Rangers awmin, an hmelma kumhlun club ai hian point kua ngawtin an sang fal mek.