Zaninah La Liga khel dawn

Spanish football-a inelna sang ber La Liga chu zanin dar 1:30 hian khelh ṭan a ni dawn a, Almeria chuan Espanyol an mikhual dawn - team pahnih intawng tur hi 'relegation battle' ti pawhin a sawi theih.

Almeria hian league-ah match 18 khel tawhin point 19 an nei mek a, table-ah 14-na ni mah se relegation zone aṭanga an himna hi point hnih chauh a nih avangin chak an mamawh hle.

Zanina an mikhual tur Espanyol hi an chung chiahah awmin, match 18-ah point 20 an nei a, relegation zone aṭanga an himna hi point thum bak a ni lo - a tawi zawnga sawi chuan team pahnihin point thum an mamawh a, team intiat tawk tak an nih avangin inkhel a hmuhnawm ang.

Segunda division aṭanga tun season-a La Liga inhlangkai Almeria hian an league match hnuhnung pahnihah team ṭha Atletico Madrid leh Valencia an inhnehtawkpui thei a, Espanyol an hlau dawn lo tih a chiang.

Mahse, Catalan club Espanyol-in league-a point 20 an neih meka point riat hi chu an league match hnuhnung pali aṭanga an hmuh tih hriat a ṭha - vawi hnih an chak a, vawi hnih an draw a, an tlawm lo.

Barcelona (1-1) meuh inhnehtawkpuiin, Girona (2-2) nen an inhnehtawk bawk a, an league match hnuhnung pahnihah Getafe (2-1) leh team ṭha Real Betis (1-0) an hneh avangin Almeria lakah inthlahrun an tum hauh lo ang.