Australian Open hmawr bawk hun a thleng

Australian Open 2023 chu a hmawr bawk a ni dawn ta. Pathianni chawhnu dar 2:00 hian mipa singles final khelh a ni dawn a, vawi kua ngawt champion tawh Novak Djokovic leh Stefanos Tsitsipas ten nomawi an inchuh ang.

Rod Laver Arena-ah nimin tlai khan semifinal khelh a ni a, seeded palina Djokovic hian darkar hnih leh minute 20 chhung lekin Tommy Paul chu 7-5, 6-1, 6-2 in a sawp a, a vawi 10 nan Australian Open nomawi chawi a tum dawn a ni.

Nimin semifinal inkhel hmasa zawkah Tsitsipas chuan Karen Khachanov chu 7-6 (7-2), 6-4, 6-7 (6-8), 6-3 in a hneh, hnehna chang tur hian darkar thum leh minute 21 chhung hun a hmang a, awlsam taka tlang chu a ni bik lo.

French Open 2021 final-ah Djokovic leh Tsitsipas te hi an lo intawng tawh a, clay court inelna lianah hian Novak a chak, tun ṭumah hian chak nawn a tum ang. Greek tlangval Tsitsipas tan phuba lak theihna remchang a ni ang.

Record a hnai

Roger Federer-a'n Grand Slam nomawi 20 a lak tlin khan thil ropui bik a ni a, midang tana tluk phak harsa tak tura ngaih a ni. Mahse, kum 36 mi Rafael Nadal-a'n a rawn tlukin a khum hial - Spanish star hian major title 22 lai a nei tawh.

Kum 35 mi Djokovic pawh zawimuangin a rawn kal zel a, tunah nomawi lian bik 21 a nei tawh - champion hnem ber Nadal tluk turin vawi khat chak chiah a mamawh ta, a hmabaka ding tur hi Tsitsipas a nih vang erawh chuan a awlsam lo mai thei.

Djokovic chuan, "Tun hma lama kan intawn tawhna sawi theih a ni lo, tunah chuan Tsitsipas hi player ṭha berte zinga mi a ni. Inkhel awlsam a ni dawn lo a, chuvangin player ṭha zawk leh a khel ṭha zawk an chang ang," tiin final a thlir lawk.

A dinhmun sawi zuiin Novak chuan, "Ka taksa dinhmun hi tunah chuan 110% a ni hial ang. Chutihrualin tournament tir lam boruak nen chuan a inang thei lo, hetiang hunah hian tawnhriat kan lo neih tawh kha a ṭangkai ṭhin," tiin a sawi.

Number 1 beiseina

Australian Open 2023-ah hian hliam vangin world number 1 Carlos Alcaraz a inlan thei lo, number 2 Rafael Nadal chu second round-ah a tla. Number 4 ni chunga tournament bul ṭantu Tsitsipas hi a champion thei a nih chuan number 1 thar a ni dawn.

Stefanos Tsitsipas chuan, "Thil lo thleng tur sawi lawk theih a ni lo, a pawimawh lai chu tuna kan dinhmun hi eng tiangin nge kan thlen tih hi a ni. Inkhel pawimawh bik ka hmachhawn leh turah hian ka theihna zawng zawng ka hlan ang," a ti.

Grand Slam nomawi la chawi chiah lo mah se Melbourne Park-ah Tsitsipas a che ṭha ṭhin, a chet ṭhat bakah Melbourne khawpuiah hian Greek mi an tam a, ṭantu a ngah ṭhin hle, atan chuan final khelh pawh a chakawm zual ngei ang.

Tsitsipas chuan, "Keini ang ram lian lo Greece aṭanga lo kal tan chuan final thlen hi a lawmawm. Maria Sakkari khan Grand Slam semifinal vawi hnih khelin sulhnu a lo hnutchhiah tawh a, keiin kan ram tan a ṭha ber thlentir ka tum dawn," a ti.