Beach Soccer-ah Mizoram chak nghal

Hero National Beach Soccer Championship khelh mekah nimin khan Mizoram chuan an match hmasa berah hnehna an chang nghal a, Andhra Pradesh chu 7-4 in an sawp.

Dumas Beach, Surat, Gujarat-a inkhelah Mizoram tan C. Lalmuanpuia leh Lalawmpuia ten goal hnih ve ve an khung a, Ṭhasiama, C. Lalremruata leh Lalremruata ten goal khat ṭheuh an thawh bawk - penalty vawi hnih an khung lo thung.

Mizoram hi group C-ah Andhra Pradesh, Uttarakhand leh Delhi te nen an awm ho a, group khat aṭangin team pahnih chu quarterfinal lut tur an ni - Uttarkhand-in Andhra Pradesh leh Delhi an hneh tawh avangin quarterfinal an lut chiang tawh.

A thiam pariat zinga tel turin Mizoram tan vawiin, chawhnu dar 2:00-a Delhi an hmachhawn hunah chak a ṭul a, Mizoram hi an chak chuan quarterfinal an lut ang.

Mizoram manager H. Lalnunzira chuan, "Kan la tih ngai loh a nih avangin harsa kan ti deuh a, tharum ngah a ngai bawk. Beiseina sang tak erawh kan nei e," tiin Vanglaini a hrilh.