Mizoram tan beiseina a awm zel

Santosh Trophy khelh meka group stage la khel zo ve lo awmchhun, group VI-ah nimin khan inkhel pathum a awm a, Jharkhand chuan 2-1 a Himachal Pradesh hnehin, Punjab leh Chandigarh chu 1-1 in an inhnehtawk a, Manipur chuan Lakshadweep chu 3-1 in an hneh bawk - result avangin Mizoram tan final round luh beiseina a awm zel.

Indian football-a state leh state inelna sang berah hian group stage-ah team 36 inelin, group parukah team paruk ṭheuh awmin ṭhen hran an ni a, group tina a ti ṭha ber leh pahnihna zinga a ti ṭha pathumin final round an khel dawn.

Mizoram chu group II-ah awmin, match khelh tur khel zo tawhin, an awmna group-ah pakhatna an ni phak lo a, pahnihna ti ṭha pathum zinga tel chu final round luh beiseina a ni - hei vang hian group stage la khel zo ve lo awmchhun group VI result hi Mizoram tan a pawimawh.

Mizoram hi tun dinhmunah chuan pahnihna ti ṭha zingah pathumna an ni mek a, group VI pahnihna hian an phak loh chuan final round an lut dawn tihna a ni - group VI-ah hian Manipur chu hmahruaitu ni mekin, point kua an nei a, pahnihna Punjab (7 pts) leh Jharkhand (6) ten match hnih khelh tur la awmah beiseina an nei vek a, Mizoram tan chuan Chandigarh-in 1-1 a Punjab an chelh chu result lawmawm a ni.