Man United mikhual tur Reading

Manchester United-in FA Cup fourth round-ah zanin dar 1:30 hian Reading an mikhual dawn. Reading hi Championship club an ni a, an awmna league-ah hian team 24 awmin 21-na an ni mek. Erik ten Hag-a hote tan chak loh chu mualphona a ni thei ang.

Royals hi Man United player hlui Paul Ince-a enkawl a ni a, fourth round thleng turin Championship club Watford 2-0 in an hneh. Chutihrualin Ince-a hote hi an match hnuhnung berah Stoke City lakah 4-0 in an mualpho.

Man United erawh Arsenal laka an tlawm hnuah League Cup semifinal first leg-ah Nottingham Forest 3-0 in an sawp a, team boruak a ṭha leh tawh. Forest an hneh ṭum hian loan hmanga an lakluh Wout Weghorst-a'n United tana a goal hmasa ber a khung.

League Cup-ah hian hrem vangin Harry Maguire a khel thei lo a, Ten Hag-a'n tlarhnungah chhawr tur pakhat a neih belh. City Ground-ah David de Gea inlan mah se FA Cup-ah erawh an khingpui tur a nem deuh avangin Tom Heaton emaw Jack Butland emaw tan khelhna hun a awm thei ang.

Ten Hag-a'n player tawnhriat ngah zawk karah player naupang zawk a khelhtir a rinawm a, Forest laka bench aṭanga lut Facundo Pellistri pawh inlan thei dinhmunah a ding. Man United hian February 1, Nilaini zanah Forest nen League Cup semifinal second leg an khel dawn a, February 4, Inrinniah Crystal Palace an mikhual leh dawn - Ten Hag-a tan squad siksawi a pawimawh ang.