Reds-in Brighton lakah phuba an la thei ang em?

Liverpool-in season an hmang ṭha lo a, Premier League-ah champion beisei ngamna chi a nih tawh loh bakah season thara Champions League khelh pawh a harsa tawh dawn.

Jurgen Klopp-a hoten mangchhia an hmang mek a, dinhmun ṭha lo aṭanga tal chhuah nan FA Cup a pawimawh. Reds hian January 29, Pathianni zan hian FA Cup fourth round-ah Brighton & Hove Albion an hmachawn dawn.

Tun thla laihawlah khan Reds hi Amex Stadium-ah 3-0 ngawtin an mualpho a, Liverpool tan FA Cup ni satliah loin phuba lakna hun a ni thei ang.

Mahse, Brighton hi an intum hmasak ṭum khan vanneih vanga chak an ni bik lo. Seagulls hian season ṭha tak an hmang a, League Cup-ah Arsenal 3-1 in an hneh thei a, league-ah Man United (2-1) leh Chelsea (4-1) te an hneh tawh bawk.

Brighton forward Evan Ferguson hi kum 18 mi chauh a ni a, tun season Premier League match nga aṭangin goal thum a khung. Ferguson hian October 2020 khan Reds zawm aiin Seagulls tana khelh a thlang zawk. Chutihrualin Ferguson-a'n Seagulls a thlan zawk chhan erawh senior team tana khelh a awlsam zawk a beisei vang a ni a, thutlukna ṭha tak a siamah a ngaih theih.

Seagulls hian World Cup star Alexis Mac Allister (Argentina) leh Kaoru Mitoma (Japan) te an kawl a, Graham Potter thlaktu Roberto De Zerbi hoin game mawi an khel - Liverpool hi mualpho thei dinhmunah an ding.

Reds hian player inhliam an ngah a, Ningani training-ah pawh Fabio Carvalho hmel hmuh tur a awm lo. World Cup zawh hnuah Roberto Firmino chuan chawn hliam vangin training a la zawm lo a; Diogo Jota (chawn), Luis Diaz (khup), Virgil van Dijk (malpui) leh Arthur Melo (malpui) te chu hun rei zawk chawl tur an la ni.

Liverpool-in result ṭha an neih theih nan Mohamed Salah a chet ṭhat a ṭul a, player thar Cody Gakpo leh Darwin Nunez te pawhin Dutch league (Eredivise) leh Portuguese league lama an tlangnel angin England lamah pawh an theihna an lantir a hun ta bawk.