Khelo India khel tur boxer pali

Khelo India Youth Games 2022 chu January 30 - February 11 inkar hian Bhopal, Madhya Pradesh-ah khelh a ni dawn a, boxing inelna bika tel tur Mizo boxer pali leh official te chuan nimin khan Lengpui an chhuahsan.

Boxing inelna bikah hian mipa boxer Lalhruaitluanga leh PC Remruatdika te tlingin, hmeichhiah Lalbiaknii leh Naom Chingsannuam te an tling. Boxer palite hi official pali, coach Lalfakzuala, manager Rozamliana, physiotherapist Angie Lalnunpuii leh massuese Lakhawngaihi ten a hmunah an ṭawiawm dawn a ni.

Khelo India-ah hian infiamna 27 aṭangin inelna neih a ni dawn a, infiamna pathumah chauh Mizoramin infiammi a tir thei dawn - boxing bakah hian weightlifting leh hmeichhe hockey-ah Mizoram hi an tling bawk.

India rama inelna ngaihhlut hlawh, Khelo India-a tel turte hi a hma kum Youth National Games emaw School Games aṭanga thlan ṭhin an ni a, Mizo infiammite an la inlan tam tawk thei lo.