Hmeichhe champion thar awm dawn

Australian Open hmeichhe singles final chu vawiin chawhnu dar 2:00 hian khelh a ni dawn. Rod Laver Arena-ah Aryna Sabalenka leh Elena Rybakina te an inkhel ang, player pakhat zawk zawk chuan a vawi khat nan Melbourne Park-ah nomawi an chawi dawn.

Player pahnih hian Australian Open final thleng turin an hmaa ding mi paruk ve ve an hneh, an chak chhoh dan pawh harsa lutuk a ni hran lo. Tun tournament khelh lai bikah chuan anni pahnih aia final luh phu an awm bik lo ang.

Semifinal hmasa zawkah Wimbledon champion Elena Rybakina a chak. Ningani zantira semifinal hnuhnung zawk khelh zawh takah Victoria Azarenka chuan mumang rama cheng lai Magda Linette chu 7-6 (7-1), 6-2 in a hneh ve bawk.

Tun hmain vawi thum an inhmachhawn tawh, heng inkhelah hian set hloh miah loin Sabalenka a chak vek a, vawiinah pawh inrintawkna sang tak nen inelna a hmachhawn ngei ang - chak tura rinkai zawk tia sawi erawh a remchang bik lo.

Kum 24 mi Sabalenka chuan, "Match hmabak pakhat ka la nei, ka duhthusam tihlawhtling turin vawi khat chak ka la mamawh a ni," tiin a sawi a, a vawi khat nan Grand Slam nomawi chawi ngei a tum ruh hle.

Sabalenka hian tun hmain US Open semifinal vawi hnih bakah Wimbledon semifinal a khel tawh, tun ṭum hi major tournament bikah chuan final a luhna hmasa ber a ni a, a tan chuan thil thar leh phurawm tak a ni ngei ang.

Tennis season kal lai hi Sabalenka tan hun duhawm a ni mek, match 10 a khelh tawhah hnehna a chang vek a, set 20 khel tawhin a la fai vek bawk, a tan kum ṭha a nih mek avangin Australian Open final a lut hi a mak lo.

Rybakina erawhin season hmasa khan Wimbledon title a la a, mahse ranking point a hmuh belh lo - Russia leh Belarus player tel an phal loh vangin ranking point hi a awm lo a ni, ranking point hmuh belh ni se chuan tunah hian a ranking pawh a sang zual ngei ang.

Kazakhstan nula hi world number 23 a ni mek a, tun inelna neih laiah hian seeded 22-na a ni phak hram; a khingpui tur Sabalenka erawh seeded pangana a ni phak thung, an dinhmun a inthlau angreng hle.

Kum 23 mi Rybakina chuan, "Wimbledon ka khelh kha chuan quarterfinal aṭang khan thil engkim mai kha a thar vek a ni a, tunah chuan ka tawnhriat hnu a ni ve ta a, inelna hmachhawn pawh a awlsam phah ve deuh," a ti.

Service a neih ṭhat vangin Rybakina hi a hlauhawm a, chutihrualin a khingpui tur Sabalenka hi khingpuite service chhuhsak thei tak a ni thung. Rilru huai pahnih, theihna nei sang leh khel ṭha tluang lai an nih avangin inkhel a hmuhnawm ang.