Copa del Rey: Madrid derby-ah Real an chungnung

Atletico Madrid striker Alvaro Morata chuan a club hlui Real Madrid lakah goal hmahruai khung mah se, Real lamin goal thumin an chhanglet a, Copa del Rey quarterfinal-ah 3-1 in Real an chak.

Ningani zan khan Copa del Rey quarterfinal hnuhnung pahnih khelh a ni a, mipui nghahhlelh Madrid derby-ah goal li ngawt a lut. Morata-a'n Atletico tan khung hmasa mahse, Real-in Rodrygo, Karim Benzema leh Vinícius Júnior hmanga chhangletin hnehna an chang.

Spanish Cup quarterfinal inkhel dangah Athletic Bilbao chuan 3-1 in Valencia an hneh a, Iker Munian, Nico Williams leh Mikel Vesga (penalty) ten goal khat ṭheuh an khung - Bilbao player Óscar de Marcos chuan an lamah a tilut bawk.

Nizan khan La Liga khelh zui nghal a ni - zanin dar 8:45-ah hmahruaitu Barcelona chuan Girona an lenchilh dawn a, Pathianni zan dar 8:45-ah Atletico Madrid chuan Osasuna lenchilhin, Real Madrid chuan Pathianni zan dar 1:30-ah team ṭha Real Sociedad an mikhual dawn.

A hun takah

Santiago Bernabeu-a inkhelah mikhual team-in goal an khung hmasa zawk a, Real Madrid B team aṭanga a career ṭantu Morata chuan a club hlui lakah goal hmahruai a khung - Nahuel Molina siamsak chu a awmna tur hmun takah lo awmin, hnai set sawt aṭangin a khung.

Team pahnihin chance nei tawn zak zak mah se, goal dang kan hmuh lawk loh avangin Atletico hi an chak mai rinna a lian hman hle. Mahse, mualneitu Real-in ngaihdan dang an nei a, mahni muala tlawm an duh lo.

Hun tawp nan minute 11 chauh a awm tawh tihah Rodrygo a inlar a, Brazilian forward hian Atletico defender rual a duhthala a bum hnuah class zetin si phurh sutna goal a khung.

Chak mai tawh tura inngai Atletico an hnual a, goal dang a luh zui loh avangin extra time khelh a ngai zui a, mikhual team chan a chhe zawk, tiin a sawi theih.

A pawi zo ta

Minute 99-na a ni a, Atletico fan-ten an hmuh duh loh an hmu - defender Stefan Savic chu Real midfielder Eduardo Camavinga lakah hlauhawm taka a chet avangin a yellow card pahnihna pek a ni a, hnawhchhuah a ni.

Atletico-in kim loa an khelh a ngai zui a, Real-in an chhawr zui - minute 103-naah Karim Benzema chuan innghahna tlak a la ni reng, tih pholangin, hmahruaina goal a khung a, Atletico an hawihai.

Real-in an duhtawk mai lo. Minute 120+1-ah Atletico fan-ten tun hnaia banner leh thil dang hmanga mawi lo taka an beih Vinícius Júnior chuan amah hawtute ngawihtirin, Real goal thumna a khung.

Real-in hnehna an chang a, Barcelona, Osasuna leh Bilbao te nen semifinal an khel dawn. Thawhṭanniah semifinal-a inhmachhawn tur draw neih a ni ang a, February thlatirah first leg khelh niin, March thla tawpah second leg khelh a ni ang.

Chhanletna

Ningani zana Madrid derby khelh a nih hmain, Vinicius-a lem, siamchawp chu Real training ground bulah khai a ni a, "Madrid khawpui chuan Real hi an hua a ni," tih a inziak bawk.

La Liga chuan fans ṭhenkhat chet dan hi na takin a dem a, Atletico pawhin, "Thil ṭha lo tak a ni," tiin fan-te chet dan a dem. September, 2022-a team pahnih intawn ṭum khan Atletico fans ṭhenkhat chuan chi inthliarna lam hawiin Vinicius hi an lo zai khum tawh bawk.

Brazilian forward hian chi inthliarna lam hawia che ṭhinte lakah Spanish league thuneitute chu che na tawk loah a puh hial a, hetihrual hian Spanish thuneitute chuan, "A titu ber chhui chhuah theih a ni lo," tiin he thil thleng an chhuina chu thla thum hnuah an titawp bawk.

Vinicius-a'n khelmualah Atletico fan-te goal hmangin a chhanglet a, a duhtawk mai lo. Inkhelh zawhah, "Madrid chu pakhat chauh a awm a, kan hre vek a ni," tiin twitter lamah a ziak zui.