El Shaarawy inlan a rinawm

Serie A hmahruaitu Napoli chuan Pathianni zan dar 1:15-ah AS Roma an mikhual dawn. Tun hnaia inkhel ve leh thei ta Stephan El Shaarawy chu Jose Mourinho-a'n a khelh tir a rinawm a, bul ṭantu zingah a tel ngei pawh a rinawm bawk.

Italian forward Shaarawy hian theihna a nei sang a, mahse beisei angin a khel tam tawk lo. Hliam a nei fo a, hei bakah hian khelmual pawn lam buaina vangin a nih tur ang a ni phak tawk lo ni pawhin a lang.

Spezia nen an inkhelh ṭumin Nicolo Zaniolo a thlak a, tlar hma lamah Paulo Dybala leh Tammy Abraham te nen an khel ho thei - anni pathum hi an inkawp rem a nih chuan Napoli tan dan an harsa dawn.

Napoli erawh chak tura rinkai zawk an ni dawn. Naples club hi season kal laiah vawi khat chiah an la tlawm a, match 19 aṭangin point 50 an hmu thei. Diego Maradona hoa an champion hnuah a vawi khat nan champion leh an beisei mek.