Madrid derby Santiago Bernabeu-ah hliam tuar Atletico

Spanish La Liga-a inkhel boruak 'hot' ber pawl chu Madrid derby a ni a, zanin dar 8:30 hian league match khel turin Atletico chuan Real hi an lenchilh dawn. 

Madrid khaw club inhal tak pahnih hi tun hnaiah an dinhmun a inthlak - Atletico-in season ṭha taka bul an ṭan laiin Real-in tluk leh din an fawm a, Barcelona leh Real chet chhiat karah Atletico-in champion tura ringtu an ngah hman. 

Mahse, league match 21 an khelh meuh chuan Real-in Barca chet chhiat zarzo telin table chung ber an luah a, Atletico erawh Champions League pawh khel thei lo dinhmunah ding mekin pangana an ni!

Atletico aia Real sanna hi point 10 a tling a, Diego Simeone naute hian zaninah hnehna an chan a, point sariha an inkar an sawr zim theih chuan champion beiseina an la nei thei ang. 

Atletico fan-ten Saudi Arabia-a Spanish Super Cup an khelh ṭuma thil thleng kha an la theihnghilh lo ang tih a chiang a, zaninah phuba lak an duh dawn. 

Jeddah khawpuia final-ah hian minute 90 chhungin goal a lut lo a, extra time khelh a ni. Minute 115-naah Atletico-in goal khungna remchang an nei a, Alvaro Morata chu tlarhmaah goalkeeper chauh hmachhawn chungin a tlan. 

Spanish striker goal khung tur hi midfielder patuai Federico Valverde chuan a remhriat dan ṭha berin a kalh thlu a, red card pek ni mah se penalty area pawn chiah a nih si avangin Atletico chantawk chu freekick a ni. 

Penalty-ah Real an chak zui a, Real fan-ten Valverde-a lim din hial an rawt! Atletico tan a na a, an hliam a dam fel hmain an hmelma laka phuba lakna remchang an nei dawn e. 

Atletico boss Simeone-a lu ti haitu tur chu player inhliam a ngah lutuk hi a ni a, senior player 16 chauh nei chungin Santiago Bernabeu a len luh a ṭul dawn - a awlsam dawn lo tihna a ni. 

Player langsar Diego Costa, Jose Gimenez, Santiago Arias leh Joao Felix te chu Argentine coach hian a chhawr thei dawn lo a, eng team tan pawh anni ang player 'class' chhawr theih loh hi chhiatpui tham a tling ang.

Koke leh Kieran Trippier te ṭangkaizia hrilh nawn kan ngai lo a, Madrid derby khelh hman hram tum mah se Spanish media-te chuan an inlan theih loh a rinawm zawk thu an sawi!

Simeone hian right back-ah tun season-a vawi khat chauh la inlan Sime Vrsaljko chu a rin luih a ngai dawn niin a lang a, Real lakah hetichunga an chak thei a nih chuan a ropui khawp ang. 

Real Madrid-in nipui transfer lai khan beiseina sang tak leh boruak sang tak nei chungin Eden Hazard an lalut a, hliamin a tlakbuak bawk nen Belgian forward hian beisei angin a la khel lo. 

Ni 65 zet chu hliam vangin a inlan thei tawh lo a, mahse zanina Atletico hmachhawn tura lo kir theih a inbeisei - zawhna awm zawk erawh Zinedine Zidane hian a 'risk' ngam kher ang em? tih chu a ni. 

Kum 29 mi Hazard hian Real a pan hnuah match 13 khelin goal khat a khung a, Real hian Cristiano Ronaldo an chan hnuah 'regular' taka goal khungtu an la nei rih lo. 

Lawmna tur erawh Karim Benzema-a'n ngai a awh leh ta hi a ni - French striker hian match sarih zet goal khung loa a awl hnuah Copa del Rey-ah Real Zaragoza lakah a khung a, tun season-a match 28-a khelha goal 17 khungtu hi Atletico tan ven bik a sual lo ang. 

Granada    5:30 PM    Espanyol

Real Madrid    8:30 PM    Atletico Madrid

Mallorca    11:00 PM    Real Valladolid

Valencia    1:30 AM    Celta Vigo

Leganes    4:30 PM    Real Sociedad

Eibar    6:30 PM    Real Betis

Athletic Club    8:30 PM    Getafe

Sevilla    11:00 PM    Deportivo Alavés

Villarreal    11:00 PM    Osasuna

Barcelona    1:30 AM    Levante