Ciro Immobile-a'n European Golden Shoe a dawng

Lazio striker Ciro Immobile-a’n Italian top flight season-a Gonzalo Higuain record nih rualin goal 36 a khung a, Serie A Golden Boot leh European Golden Shoe a dawng.

Inrinni zan khan Lazio-in tun season Serie A match hnuhnung berah Napoli 3-1 in an hneh lo a, Immobile hian Higuain record a nih rualna goal khung. Italian striker hian tun season-ah minute 3175 a khel a, minute 88 dana goal khat zel khung ang a ni. Immobile hian goal 36 zinga goal 14 hi penalty aṭanga a khung a, goal attempt vawi 119 neiin target-ah vawi 71 a kal a, assists vawi kua a nei bawk.

Serie A top scorer hnenah Capocannoniere hlan a ni ṭhin a, mi bik te huangah Ciro Immobile a lang. Italian forward hi tun season match 36-ah a inlan a, goal khung lohna match 12 chauh a nei - ṭum hnih hattrick a siam a, league match kuaah a zawn zatin goal a khung a, season tawp lam match ngaah goal a khung vek bawk. 

Lazio striker hnaih bertu Cristiano Ronaldo-a’n goal 31 a khung a, Juventus forward hi match tawp bera a inlan loh avangin league match tawp ber khelh hmain Immobile hian top scorer chawimawina a dawng dawn tih a chiang.

Amaherawhchu Immobile hian Serie A record nih rual turin Napoli lamah a khung a; 1928–29 season-a Torino striker Gino Rossetti leh 2015–16 season-a Napoli striker  Gonzalo Higuaín te record nih rualin season khatah goal 36 a khung.

Immobile hian 2013–14 leh 2017–18 season te khan Serie A top scorer a ni tawh bawk a; Giuseppe Meazza, Aldo Boffi, Gigi Riva, Paolo Pulici, Roberto Pruzzo,  Michel Platini leh Giuseppe Signori te nen vawi thum Capocannoniere chawimawina dawng thei a ni. Top scorer ni ngun ber erawh Milan striker Gunnar Nordahl a ni a, 1949-55 inkar khan vawi nga zet a dawng.

Europe-a goal khung tam ber hnenah European Golden Shoe hlan ṭhin a ni a, France chanchinbu lar L’Équipe in bul an ṭan a, 1996–97 season aṭangin European Sports Media in an kut ken tawh. Inelna hian kalphung a nei a, Europe league sang panga te chu 2 in an puntir a, parukna aṭanga 22-na te chu 1.5 in an puntir a, 22-na hnuai lam chu 1 in an puntir thung.

Tun season-ah Bayern Munich striker Robert Lewandowski-a’n Bundesliga-ah goal 34 a khung a, European Golden Shoe dawng turin a dinhmuna ṭha. Amaherawhchu Serie A lama Ciro Immobile leh Cristiano Ronaldo te top scorer nih tuma an um chhoh avangin European Golden Shoe dawng tur thlengin a ngaihnawm chho a, a tawpah chuan goal khung tam ber Ciro Immobile-a’n a chang ta.

Immobile-a’n European Golden Shoe hi a vawi khat dawnna tur a ni a, hetihlai hian Lionel Messi chuan vawi ruk zet dawng tawhin Ronaldo-a’n vawi li dawngin a dawt. Kumina vanduai Lewandowski hian European Golden Shoe hi a la dawng ngai lo a, chutihrualin Europe league lian danga match 38 an khelh laiin Bundesliga-ah match 34 chauh an khel tih hriat a ṭha.