Australian Open chu Djokovic ta a ni

Novak Djokovic chuan Stefanos Tsitsipas chu 6-3, 7-6 (7-4), 7-6 (7-5) in a hneh a, a vawi 10 nan Australian Open nomawi a chawi - Grand Slam champion hnem lamah record nei ṭha ber Rafael Nadal (22 titles) a nih rual ta.

Serbian star hian Greek tlangval hneh turin darkar hnih leh minute 56 chauh hun a hmang. Tournament tir lamah malpui na vangin buai deuh mah se, a tawpah meuh chuan '110%-in ka dam' tia a sawi kha a takin a lang.

Australia boruak

Melbourne Park-ah nimin tlai khan ni a sa lutuk lo a, thli thaw deuhin chhum tam vak lo a awm bawk. Rod Laver Arena chu a chung khuhna hman ngai loin final a khelh theih a, an ram boruak awm dan ngaihtuah chuan hun duhthusam tiin a sawi theih.

Australia ramah nipui lai a ni a, khaw lum vangin player ṭhenkhat chuan harsatna an tawk fo. Ruah a sur chang a awm, ruah surah stadium chung khuhna hman a ngai, nipui boruak lum nen chuan inchhunga inkhelh chu a harsa zual ṭhin - nimin tlai erawh boruak a ziaawm.

Rod Laver Arena hi mipui 14,820 lenna a ni a, a hmuna entu ni tur chuan vanneih a ngai. Stadium pawnah pawh fans an pungkhawn hnem, sulhnu nei ṭha Djokovic ṭantute chu Serbia ram puanzar (flag) keng chungin an kal khawm hnem hle.

A changtupa Novak

Player ṭhenkhat tan chuan final boruak pawh zamna tham a ni ṭhin, world number 5 Djokovic tan erawh thil thar a ni hran lo. Service hmasa zawkah a ṭang a, set khatna bikah phei chuan a khingpui hi break point pawh a hmuhtir miah lo.

Set hnihnaah double fault neiin service a hloh zui teuh hle, mahse hnufual thei dinhmuna a din lai tak hian a khingpui service a chhuhsak let. Tie break-ah pawh chesual hmasa leh zauh mah se a tho chhuak leh tho, hun harsa lai takah a chefuh zawk zel.

A service pawh a hloh ve ngei, amaherawhchu boruak sangah tawnhriat a neih a lang leh ṭhin a, mipui puihna a dawn ṭhat bawk avangin Djokovic tan chuan Australian Open hi chu hmun nuam leh thlan awm bik a ni chiang hle.

Nomawi 22-na

Novak Djokovic hi kum 35 mi a ni tawh a, a vanglai a pal deuh tawh - mahse a inkhelh thiamna hmun bikah chuan amah elphak an la awm lo chiang hle; Grand Slam nomawi 22 a chawi tawh a, a lak belh ngei pawhin a rinawm.

Djokovic elpui Nadal hi kum 36 mi a ni thung, kumin June thlaah kum 37 a tling ang. Spanish star hian French Open chu a lak leh mai a rinawm, inelna lian dangah erawh a champion leh ngei ang em tih sawi ngam a harsa, thil theih loh erawh a ni bik lo.

Roger Federer a chawl tawh a, tun dinhmunah chuan Djokovic leh Nadal te hian Grand Slam champion hnem ber dinhmun an inchuh chho zel dawn a, tun season chhung ngei pawhin an dinhmun a in thlak zak zakin a rinawm - tennis a la hmuhnawm zel dawn.

A ruh no no chhuak

Australian Open hi Stefanos Tsitsipas inkhelh thiamna hmun a ni a, tun tournament pawh a khelh ṭhat em avangin beiseina pawh a nei sang hman. Mahse, set khatnaah vawi khat service hloh zet pawi zia a takin a hmu nghal.

Set hnihnaah a khingpui service chhuhsak theihna remchang ṭha bik a nei, mahse a khingpuiin double fault a neih hnuah pawh a tlang thei tlat lo. Set thumnaah Novak service chhuhsak ve mah se ama service a hum thei lo zui a, a beiseina a thamral zui.

Ball vaw na leh service nei ṭha zawk a ni a, aces ringawt pawh vawi 15 a siam thei. Amaherawhchu, player ropui dangten an neih ang a neih loh chu hun pawimawh laia point hmuh a ni, chumi tur chuan rilru huaisen leh paukhauh zawk a mamawh.