Sabalenka tan Grand Slam nomawi hmasa ber

Aryna Sabalenka chuan tennis a khelh chhunga hun lawmawm bik a tawng. Inrinni tlaia Australian Open hmeichhe final-ah Sabalenka hian Elena Rybakina hnehin a vawi khat nan major tournament-ah a champion.

Rod Laver Arena-a inkhelah, seeded 22-na Rybakina-i'n set a la hmasa - Wimbledon champion hi a dinhmun a ṭha a, bul a ṭan fuh avangin a champion zui leh mai pawh a rinawm hman hle.

Mahse, seeded pangana Sabalenka hi huaisen takin a tho chhuak. Inkhel a tawp meuh chuan vawi 51 ngawt winners vaw chhuak chungin hnehna a chang let ta daih a, tennis a khelh hun chhunga a tawn san ber ṭum a tawng a ni.

Champion ta Sabalenka hi Belarus mi a ni a, mahse Russia leh Ukraine buaina chungchangah Belarus an inrawlh a, infiamna huangah an ram hi hrek lai an nih avangin Belarus hmingin a inlan thei lo - neutral athlete a nih a ngai.

Season hmasa khan Wimbledon-ah pawh Russia rama piang leh sei lian Rybakina a champion. Mahse, Rybakina hi infiamna huangah chuan Kazakhstan hminga inlan ṭhin a ni, a nihna takah chuan Russian thisen kai a nihna a bo chuang lo.

Kum 24 mi Sabalenka chuan, "A nihna tak sawi chuan double fault ka ngah, a bul ka ṭan dan pawh a ni. Mahse, a rukin ka infuih mawlh mawlh a, chesual nawn loin hun ṭha hman ṭangkai kha ka tum ngar ngar.

"Inkhel hautak tak zawh hnua hnehna changtu nih chu a nuam danglam bik. Grand Slam champion han nih chu thuin ka sawifiah thiam lo, ka hlim em em ringawt mai a, ka nuna hun nuam leh hlimawm ber chu a ni.

"Tunah chuan keimah leh keimah ka inngaih dan pawh ka thlak tawh. Mi ten ka hming ziak (signature) te min dil ve ta a, hetiang hun hi ka lo suangtuah ṭhin kha a ni a, hemi thleng tur hian ka thawkrim bawk," a ti.

Chak lo zawk Rybakina tan pawh tournament chhinchhiah tlak tak a ni tho. Final kalkawngah hian Iga Swiatek, Jelena Ostapenko leh Victoria Azarenka te a hneh. Jennifer Capriati (2001) hnu lamah Australian Open-a Grand Slam champion tawh player pathum hneh thei hmasa a ni hial.

Kum 23 mi Rybakina chuan, "Rybakina khan service a nei ṭha em em a, a ball vuak a nain ka tan chuan lo dawnsawn kha a harsa thei hle," a ti. Player pahnih hi vawi li an intawng tawh a, hengah hian Sabalenka a chak vek.