Mumbai tan a changtupa Lianzuala

Mizo tlangval Lallianzuala Chhangte chuan Indian Super League-ah goal a khung leh ta a, Zirtawpni zan khan Mumbai City chu Jamshedpur FC lakah 2-1 in hnehna a chanpui.

Lianzuala hian goal a khung bakah Vikram Singh-a goal khung tur a siamsak bawk a, tun season ISL-ah goal kua khungin assist vawi nga a nei tawh - 'Mizo Flash' hi JFC lakah hian hero of the match atan thlan a ni a, tun season-a vawi li thlan a nihna a ni.

Mumbai City-in league match 16 khelh tawhah tlawm an la nei lo a, league hmahruaitu an ni mek. Inrinni zan khan Bengaluru leh ATK Mohun Bagan te chuan hnehna an chang bawk.

Mizo Flash

Zirtawpni zan ISL inkhelah Jamshedpur-in rin loh takin goal hmahruai an khung a, minute 63-naah Boris Singh chuan Men of Steel tan goal hmahruai a khung - chak tuma inkhel Mumbai an hawihai.

Mahse, mikhual team hi an hawihai rei lo. Lunglei tlangval Lallianzuala'n Mumbai fan-te hrilhhai tur ngai ngam loin, minute 80-naah si phurh sutna goal a khung a, minute 86-naah Vikram Singh khung tur a siamsak bawk.

Tun season-ah a vawi khat nan Mumbai an tlawm dawn emaw tih laiin, Lianzuala'n a chhan chhuak a, a tlan chak leh chet ran em avanga 'Mizo Flash' hming lem an pek hian a hming a chher zel.

A hmaah record

Lianzuala'n tun season-ah match 16 khelin goal kua a khung tawh a, assist vawi nga a nei bawk - goal 14 a thawk chhuak tawh tihna a ni a, Mizo legend Jeje Lalpekhlua'n ISL season a hman ṭhat ber ṭum (2017-18) season-a a goal khung zat a nih rual.

Hnahthial tlangval Jeje-a'n top flight league season khata goal a khung hnem ber erawh 2010-11 kha niin, Pailan Arrows tan match 15-ah goal 13 a khung a, he record khum tur hian Lianzuala tan goal li khung a la ngai.

Indian player zinga ISL season khata goal khung hnem ber chu Sunil Chhetri a ni a, India captain hian 2017-18 season khan match 21-ah goal 14 a khung - Lianzuala tan he record nih rual tur hian goal nga a la ngai.

Mizo an inlar

Mumbai hnehna chan zanah Lianzuala bakah Lalengmawia Ralte (Apuia) chu Mumbai tan bul a ṭan a, Jamshedpur lamah Ricky Lallawmawma leh Laldinliana Renthlei ten inkhel bul an ṭan bawk.

Inrinni zan ISL inkhelah Dimitri Petratos goal hnih hmangin Bagan chuan 2-0 in Odisha an hneh a, Kolkata club tan K. Lalṭhathanga chu minute 85-naah lutin, Odisha tan Jerry Mawihmingthanga'n bul ṭanin, Isaac Vanmalsawma leh Isak Vanlalruatfela te chu bench aṭangin an lut bawk a ni.

Mizo tel lohna inkhelah Bengaluru-in 3-1 in Chennaiyin an hneh a, Bangalore club tan Siva Narayanan chuan goal hnih khungin Rohit Kumar chuan goal khat a khung bawk a, Chennaiyin tan Edwin Vanspaul chuan goal khat thawh ve mah se awmzia a nei phak lo.