City hneh loin Arsenal an tla

Premier League champion lai Manchester City chuan, kumina an league nomawi chhuhsak tumtu Arsenal chu FA Cup fourth round aṭangin an pet chhuak, an mikhual hi Nathan Ake-a goal khat hmangin 1-0 in an hneh.

Zirtawpni zan khan Etihad Stadium-ah Mikel Arteta naute an lenglut a, league hmahruaitu Arteta-a'n a player thlan dan aṭangin league a ngai pawimawh tih a hriat, an ṭhat dan berin an inrem lo.

Captain Martin Odegaard, Oleksandr Zinchenko, William Saliba, Gabriel Martinelli leh goalkeeper Aaron Ramsdale te bench lamah an ṭhu vek a, inkhel bul erawh an ṭan ṭhain Man City goal an nawr ngam.

Mahse, Pep Guardiola-a'n a hnuaia inzir ṭhin Arteta leh a naute a dang thiam a, second half minute 64-naah pound maktaduai 100 man Jack Grealish-a ball pek chu defender Ake-a'n cool deuhin a khung, he goal hi chak nan a tawk.

Man City manager Guardiola chuan, "First half-ah kha chuan kan khel ṭha tawk lo tih phat tur a awm lo, second half-ah erawh kan khel ṭha zawk. Arsenal khan an khel ṭha hle a, kan danglamna chu tlemte chauh niin ka hria.

"Ake tan season duhawm a la ni zel, a nihna takah chuan tun season kal laia forward hlauhawm berte zinga mi Bukayo Saka a lo dan chah dan kha a turu, a bik takin ball kang leh set piece-ah khan a ṭangkai zual," tiin a defender a fak hle.

FA Cup champion hnem ber Arsenal hian Premier League champion an tum a, cup inelna huanga thapui an thawh chiah lo kha a mak lo. Chutih rualin Citizens tho hi league lama an elpui tur an ni a, vawi hnih an la intawng dawn.

Gunners manager Arteta chuan, "Tun aia ṭha zawk khan khel thei tur kan ni. Man City hi khawvela team ṭha berte zinga mi an ni tih kan hria, anni kan hmachhawn theih danah lawmna tur tam tak a awm.

"Kan inkar a zim hle niah ka ngai, chutih rualin inkhel pawimawh leh hautak bikah chuan chak dan hriat a pawimawh, chutiang chiah chu tun ṭumah pawh khan kan mamawh chu a ni," tiin a sawi a, goal an khung thei lo chu pawi a tih thu a sawi bawk.

Arsenal midfieder Thomas Partey chuan a khel bawrah hliam a tuar a, a chawlh chen tur tak sawi theih a la ni lo. Thlasik bazar lai a ni a, North London club hian midfielder Moses Caicedo chu Brighton aṭanga lakluh an tum.

Caicedo lak tumin Gunners hian pound maktaduai 60 an theh chhuak ngam a, mahse hei hi English club Brighton chuan an lo hnawl. An dilna hmasa hnawl a nih hnuah an indawr nawn leh a, an la inrem rih lo thung - Caicedo hi Chelsea pawhin an ngaihven.