Man United chakna hnar Casemiro

Mancheser United chuan Inrinni zan khan FA Cup fourth round-ah Reading 3-1 in an hneh a, Casemiro chuan goal hnih khungin club tana a pawimawhna a pholang. Erik Ten Hag-a hoten inelna pali Premier League, Europa League, FA Cup leh League Cup-ah nomawi beiseina an la nei vek.

Dutch manager Ten Hag hian FA Cup a ngai thutak tih a lang a, an mual Old Trafford-ah Championship club Reading an mikhual chungin player a siksawi meuh lo a, tlarhnung erawh a thlak danglam hret. Man United hi inelna paliah an la dam vek avangin match khelh tur an ngah a, February 1, Nilaini zan hian Nottingham Forest nen League Cup semifinal second leg an khel lehnghal dawn.

Man United goal bawh a na a, amaherawhchu Wout Weghorst, Christian Eriksen, Marcus Rashford, Bruno Fernandes leh Antony ten chance ṭha an hlah vek. Reading-in first half ṭang tluang turin VAR puihna an mamawh a, Rashford goal khung chu Weghorst offside vangin pawm a ni lo.

Second half-ah Casemiro-a'n danglamna a thlen a, Brazilian midfielder hi khingpuite goal nawr tur dang chattu tia hriat lar ni mah se goal hmaah pawh a hriam hle. Casemiro hian tawih zetin minute 54-naah hmahruaina goal a khung a, minute li hnuah box pawn aṭangin ṭha zetin a pet goal bawk. Fred pawhin striker tih goal niawma mawiin minute 66-naah a kheng lut a, hemi hma hian Reading striker Andy Carroll chu hnawhchhuah a ni.

Ten Hag-a'n player naupang zawk khelhna hun a siamsak a, chutihrualin player 10-a khel chungin Reading-in Amadou Salif Mbengue hmangin siphurh an sut ṭhen a, goal dang erawh a luh belh lo.