Son-a hun a thleng ta

Inrinni zan khan Deepdale-ah Tottenham Hotspur-in mualneitu Preston North End chu 3-0 in an sawp a, season bul ṭan ṭha lo South Korean tlangval Son Heung-min chu London club 'hero' a ni.

Antonio Conte hoten FA Cup fifth round an lut a, Italian manager tan Son-a che ṭha hi chanchin lawmawm a ni ang. First half-ah goal a luh loh hnuin Son hian minute 50-naah box pawn aṭangin kawh zetin goal kilah a khung a, minute 69-naah Spurs forward hian box chhungah mawi zeta ball virpuiin goal hnihna a khung leh bawk.

Spurs tan Arnaut Danjuma chuan minute 87-naah chak nemnghehna goal a khung. South Korean foreward hian season liam ta khan goal 23 khungin top scorer a ni a, tun season-ah beisei angin a la che ṭha lo - league-ah phei chuan goal li chauh a la khung.

Spurs forward Son chuan, "Inrintawkna neih nan ka tan goal kha a pawimawh a ni," tiin a sawi. Conte hote hian February 5, Pathianni zan hian league-ah champion lai Manchester City an mikhual dawn a, Son chet ṭha hi Pep Guardiola hote tan chuan hriat nuam a ni lo ang.