Mumang a thleng dik ve chawk - Immobile

Ciro Immobile chuan record nih rualin Serie A top scorer a ni a, tun season-a a hlawhtlinna avanga a lawm thu a sawi. Kum 30 mi Immobile chuan, "Ka hlawhtlinna avangin ka lawm takzet. A bik takin ka thil paltlang te ka ngaihtuah a, ka lawm lehzual. Kan beisei tlat chuan mumang pawhin thlen dik chang a nei a, coach leh ka khelhpuite vang liau liau a ni a, record hi team thawhrah a ni. Lazio ṭantute chungah pawh ka lawm. Kan beisei tlat chuan a thleng dik 

ṭhin a, mi dang tana entawntlak nih ka duh," tiin a sawi.

Hun kal tawha a teammate-te thlawpna sawiin Immobile chuan, "Verona laka hattrick ka siam khan dressing room-ah ka lut a, ka teammate-ten min lawmpui dan khan min hneh takzet. Infiamna hian hlimna tam tak min pe a, Italian football chanchina ka hming a chuang ve tur hi ka lawm a ni," a ti. Ciro Immobile hi February 30, 1990 khan Torre Annunziata, Italy-ah piang a, Juventus-ah inzir chhuak mah se Old Lady-ah khelhna hmun chang loin Siena, Grosseto leh Pescara-ah te intuai hriam turin a chhuak. Turin club tana ṭhat tawk loh avangin Genoa-ah a kal a, season khat hnuah Torino-ah insawnin league-ah goal 22 a khung a, top scorer niin hming a chher hle.

Beiseina sang tak nen Immobile hian Borussia Dortmund a zawm a, beisei a pha lo. La Liga club Sevilla-ah loan in a chhuak a, hliamin a tlak buak bawk nen Spanish club tan pawh a hlawhchham. A hming ṭhat tawhna Torino-ah a kal a, hemi hnu hian Lazio-ah kalin a theihna a lanchhuahtir. Lazio hi nikum khan Coppa Italia-ah a champion pui a, tun season-ah palina a nihpui bawk. 2017-18 season khan Serie A leh Europa League-ah top scorer a ni kawp a, Lazio tana season li a khelh tawhah a la khel ṭha char char. Italy tan Immobile hian 2014 aṭang khan a khel ṭan a, match 39 khelhin goal 10 a khung tawh a ni.