Bayern Munich an la che fuh thei lo

Bundesliga-ah champion lai Bayern Munich-in kuminah chak hmel an la hmu lo. Julian Nagelsmann-a hote hi Inrinni zan khan Eintrancht Frankfurt nen 1-1 in an inhnehtawk.

Bavarians hian kuminah league match thum an khel tawh a; RB Leipzig, FC Cologne leh Frankfurt te nen 1-1 vekin an inhnehtawk. German champion tlarhnung a phui lo a, tlarhma lamin goal an khung thei tawk lo bawk.

Allianz Arena-ah Thomas Muller-a'n bul a ṭan a, German forward hi match hmasa pahnihah bench aṭangin a lut. Frankfurt lakah Bayern an chungnung hret a, Leroy Sane-a'n minute 34-naah ṭha zetin a pet goal a, a siamsaktu hi captain Muller a ni.

Second half-ah Muller ke aṭanga ball chhuak ṭha chu Jamal Musiala-a'n Eric Maxim Choupo-Moting tan siamsak mah se Cameroonian striker-in a kheng ṭha tawk lo. Hemi per hi Sane-a'n goal-ah pet mah se Frankfurt defender-ten an dang.

Frankfurt erawhin an chance ṭha an hlah lo a, minute 69-naah Kolo Muani-a'n Daichi Kamada laka a ball hmuh chu a hnampui Dayot Upamecano bum nan hmangin chiang zetin a pet goal. Bayern-in goal dang khungna hun nei mah se an khung thei tawh bik lo a, 1-1 in an inhnehtawk.

Bundesliga-ah champion inchuh boruak a nun phah thung. Bayern hian point 37 hmuin hmahruaitu ni mah se Union Berlin-in point khat chauhin an pha tawh lo. Leipzig leh Freiburg te pawhin Bavarians hi khelh zat inangah point hnih leh point thum chauhin an pha lo bawk.