February-ah Robula Chess Trophy

Mizoram Chess Association chuan February 8-10, 2023 chhung hian Ramhlun Indoor Stadium, Aizawlah 43rd Robula Chess Trophy (MCA Rating Tournament) a buatsaih dawn. MCA chuan Mizoram chhung Chess khel thiam zawng zawng tel vek turin a sawm. Inelnaah hian lawmmanah pawisa fai Rs. 1,19,700/- sem ral a ni ang.

Inelna hi open category bakah kum bithliah inelna Under 7, 9, 11, 13, 15 leh 17 te a awm dawn. Category tinah hian lawmman ṭha tak a awm dawn bakah special prize a awm ang. Special prize hi player tel naupang ber leh upa ber tan a awm ang a, ranking nei lo player che ṭha ber leh inchei nalh ber (best dressed) tan lawmman a awm ang.

Inelna hmachhawn tur tan AICF Registration tih ngei a ngai. AICF Regn. la nei lo emaw active lo emaw chuan AICF website-ah Online hmangin an in register/renew tur a ni ang a, a hrana Entry Fee pek erawh a ngai lo ang. Active AICF Registration tan Entry Fee hi Rs 200 per player a ni thung ang.

Naupang, kum 17 chin hnuai lam tan pawh AICF Registration hi neih ngei a ngai a, tithar tan entry fee hran a ngai lo ang a, active lai tan erawh Rs.50 per player a ni thung ang.

Entry Fee hi February 6, Thawhṭanni thleng MCA Office, Room No. 501, 5th Floor, Aijal Club-ah 10:00AM – 4:00PM chhungin pek theih reng a ni.

AICF Regn. fel tawh sa, entry fee GPay-a pe duh tan Lalruatsanga, MCA Jt. Secretary phone number 9436196647-ah a pek theih a, pek fel hnuah detail – Hming, Address, Phone No (Whatsapp) te chu 98623 74198 / 9612298305-ah hian hriattir leh tur a ni ang.

AICF Registration la nei lo tan AICF website – https://prs.aicf.in/new-regist... atangin tihfel mai theih a ni. Online Registration thiam lo, harsatna nei chuan 96122 98305 emaw 98623 74198 ah te hian zawh chian theih a ni.