Mizoram an tlawm; beisei a tlem

Hero National Beach Soccer Championship khelh mekah Mizoram chuan nimin khan 7-4 in Uttarakhand an ngam lo a, quarterfinal lut turin beiseina a tlem ta hle.

Dumas Beach, Surat, Gujarat-a inkhelah C. Lalremruata, Rampianmawia, R. Lalmuankima leh Lalawmpuia ten goal khat ṭheuh an khung a, mahse, Uttarakhand lamin goal sarih an khung avangin Mizoram an tlawm.

Mizoram hian an match hmasa berah 7-4 in Andhra Pradesh hneh mah se, Inrinni khan Delhi chu 7-6 in an ngam lo bawk - Delhi lakah hian Lalawmpuia leh C. Lalmuanpuia ten goal hnih ve ve khungin, Lalremruata, Ṭhasiama leh Lalrintluanga ten goal khat ṭheuh an khung bawk. Mizoram hi quarterfinal lut turin Andhra Pradesh kutah an innghat tawh.

Andhra Pradesh hian vawiinah Delhi an hmachhawn dawn a, an chak chuan goal difference en tur a ni a, goal difference nei ṭha Mizoram tan tlangna chance a awm - mahse, AP tan chuak tur chuan thilmak a thlen a ngai ang.

Mizoram manager H. Lalnunzira chuan, "Kan vawi khat khelhna a nih avangin harsa kan la ti deuh a, kan la thiam tawk lo. Inrinni khan Delhi nen kan inhnehtawk viau a, kha khan min tichau a, Uttarakhand lakah pawh kan tlawm phah niin ka hria," tiin Vanglaini a hrilh.

Mizoram hi group C-ah Andhra Pradesh, Uttarakhand leh Delhi te nen an awm ho a, group khat aṭangin team pahnih chu quarterfinal lut tur an ni a, Uttarakhand hi tling chiang tawh an ni.